Aizawl West Derby a hmuhnawm
Chanmari West captain Laldam-puia'n goal a khung leh ta a, Nigerian defender Balogun Hammed hoin Dinthar FC-in point an sual chhuak thung. Zirtawpni zan Mizoram Premier League Season 5 inkhel hmuhnawm bikah West Warrior leh Dinthar 1-1 in an inhnehtawk.
Referee ṭha!
Aizawl West Derby-ah goal ropui, penalty bakah offside vanga goal pawm loh thlengin hmuh tur a awm a, inkhel entu tamna leh boruak sangah referee Lalbiakhlua'n inkhel a thunun ṭha hle.
Tun hnaiah referee sawisel a tam a, amaherawhchu referee bika MFA hmalaknain rah ṭha a thlen tih khelmual chhungah a lang a, ngai -awh tur leh hmasawn tur chuan ṭan zel an la mamawh ang.
West Warrior coach HC Zarzo-liana chuan, "Referee-in hnai tak aṭangin thil thleng kha a hmu a, penalty area chhunga handball chu penalty tur a ni. Referee thutlukna kha ka ṭawmpui e," tiin penalty chawi mah se referee thutlukna a fak.
Referee hian hnai tak aṭangin thil thleng a hmuh hman zel avangin inkhel boruak sang mah se a thutluknaah rinhleh tur a awm lo a, inkhel hmuhnawm awm theihna kawngah a pawimawh hle.
Dampuia a pui
Laldampuia'n match hnih chhung goal a khung loh hnuah goal a khung leh ta a, West Warrior captain hian minute 11-na lekah defender R. Lalawmpuia vawrh luh chu out mai tura ngaih ni mah se a la hman mai ni loin goal-ah a chantir. Minute 90 chhung Dinthar tlarhnung tan buaipuiawm khawpa a khelh vangin Dampuia hi man of the match-a thlan a ni.
Dampuia ang thoa hming lang-sar R. Laldanmawia erawh a club hlui Dinthar lakah goal hmaa vanneihna a nei lo. CWFC tan Lalbiakhlua a
ṭangkai tel a, Armed Veng tlangval ball pet thiam hian vawi tam entu mipui mit a titlai bawk.
Dinthar nge nge
Hma taka goal an chhuah avang--in Dinthar an hnual lo a, MPL1 champion striker Michael Lal-remruata'n si phurh sutna goal first half-ah a tauh lutah a inngai hman - offside vanginn pawm a ni lo.
Minute 63-naah Samuel Laltlan-thanga ball pet chu West Warrior defender R. Lalawmpuia (Mapuia) kut perin referee-in penalty spot a kawk nghal a, Nigerian defender Balogan Hammed-a'n kawh zetin a pet goal.
Hmuhnawm lai chu
Goal venhim aiin goal khung an ngai pawimawh ve ve a, an in-nawr tawn chhawk zak zak. Hun tawp dawn hnaiah Dinthar for-ward tlan chak Lalruatpuia'n kee-per Lalmalsawma Hmar chiah a hma-chhawn hnuah goal ban a pet per.
West Warrior lamin an nawr let ve lehnghal a, Dampuia'n box pawn aṭangin goal ban a pet per leh bawk. Tun season Aizawl West Derby hmasa zawkah West Warrior 4-0 in an chak a, vawi hnihnaah erawh 1-1 in an inhnehtawk thung.
Dinthar hmabak
Dinthar FC coach Lalhlupuia Sailo chuan, "Kan player-te hnenah 'in ti thei a ni, theihtawp chhuahin intih tur ṭheuh kha va ti ula' tiin kan infuih a, ka nauten theihtawp an chhuah avangin ka lawm a ni. Khawvelah hian tih theih loh a awm lo a, kan hmachhawn leh tur Aizawl FC pawh hi kan hneh theih ang," tiin inkhelh banah a sawi.
MPL1 champion hian point 12 hmuin table-ah panganaah an awm mek a, match thum khelh tur la awmah Dinthar FC hi semifinal lut thei an la ni.
Khelmual sirah vanduaina
He inkhel entu zinga mi, Chanmari West FC ṭantu Lallawmkima (33) chu Zomuanthanga Stand aṭangin a tla palh a, damdawi-inah a boral zui. MFA bakah MPL club hrang hrangte'n an tawrhpuina thu an chhuah hlawm a ni.
Tute nge inlan?
Dinthar FC (4-3-3) : Joseph C Lalruatfela; Stephen Lalnunmawia, Balogun Hammed, VL Chhanhima, Saihmingthanga; Lalbiaknia Pautu, Carter Ezebube Clarence, Samuel Laltlanthanga; Lalruatpuia, Michael Lalremruata, Sandip Allay (Cho Tshering Lepcha 58').
Chanmari West FC (4-1-4-1) : Lalmalsawma Hmar; Racy K. Lalremmawia, R. Lalawmpuia, Toky Zomuanpuia, Vanlalzuia Hnamte; K. Lalnunzama; R. Laldanmawia, Lalmuansanga (Lalmuanzuala 64'), Lalbiakhlua, Laldampuia; H. Lallianzama.
ZoFooty Statistics
Dinthar FC 1-1 Chanmari West
DFC : Balogun Hammed 63' (P)
CWFC : Laldampuia 11'
MoM : Laldampuia, CWFC
48% Ball Possession 52%
13 Shots 23
3 On Target 6
2 Yellow Cards 2
0 Red Cards 0
Powered By Rainbow Multibrand
Mobile Showroom