Wales chelhtu Serbia

Euro semifinalist Wales-in beiseina sang tak nen Serbia lo mikhual mah se an duh ang result an hmu thei lo a, an mikhual nen hian 1-1 a inhnehtawkin 2018 Russia World Cup khel tur chuan an insiamṭhat a ṭul ang.

Cardiff City Stadium-a inkhelah Hal Robson-Kanu thawhrah sengin Gareth Bale chuan minute 30-naah goal hmahruai a khung a, team pahnih innawr tawn zak zak mah se goal dang erawh a lut lawk lo. Minute 85-na a ni a, Real Madrid forward Bale-a'n post a pet per hnu lawkah Aleksandar Mitrovic a inlar, Newcastle United striker hian an mikhualna ramah an si phurh sutna goal a khung avangin team pahnih hi 1-1 in an ṭin.

Wales leh Serbia inkhelh ṭum hian Southampton forward Dusan Tadic chu Wales defender Neil Taylor-a'n a hnarah a pet palh a, a dinhmun chiah hriat theih a la ni lo.

Wales chak loh laiin Republic of Ireland chuan 1-0 in Austria an hneh a, Group D-ah hmahruaitu an ni. Pathumna Chris Coleman-a naute nena an inthlauhna hi point li niin March 24-ah Britain ram pahnih hi an inhmachhawn dawn a, Inrinni zan result vang hian British Derby hian ngaihven a hlawh phah zual sawt ang.