Kulikawn hnehtu Chanmarians an champion

Inrinni khan President's Cup 2016 chu Suaka Memorial Cricket Ground, Sihhmuiah khelh niin Chanmarians chuan Kulikawn CC lakah wicket kua (9) a hnehna changin a vawi nga nan champion nomawi an chawi.

Ṭhum vawra chak zawk Chanma-rians-in batsman an neih ṭhat hriain vawm hmasak an thlang. Kulikawn tan captain Michael Lalremkima chu run 6 chiah a siam hman tihin a out nghal a, semi final-a half century vaw chhuaktu Lalrinsanga pawhin run 17 bak a siam thei lo. Prasanjit Sarkar (20 runs) leh Parvez Ahmed (27 runs) ten Kulikawn lam dinhmun rawn chawikang hret mah se Golu Vikash Kumar leh Lalbiaktluanga te an rawn duck out leh tak si avangin vawi hnih champion tawh Kulikawn lam hian wicket 8 hlohin Run 102 an siam.

Chanmarians bowler Raj Kumar chuan run 16 chauh pein wicket 3 a la a, Lalthanzuala pawhin run 15 pein wicket 3 a la ve bawk a. Kulikawn hian semi final-ah champion lai Chhinga Veng CC chu wicket rukin hneh tawh mah se final-ah erawh Kumar leh Best Bowler Lalthanzuala te lakah run an siam hleithei lo a ni.

Chanmarians tan target 103 hi tam tak angin lang lo mah se opener Lalhruaizela chuan run 11 chauh siamin a out avangin an beisei angin thil a kal vek bik lo. Amaherawhchu, hun pawimawhah Lalhmangaiha a rawn ding chhuak a, Player of the Tournament hi a tawp thlenga damin run 64 a siam - vawi kua lai boundary pelin a vua. Chanmarians hian over 14.3 lekah wicket khat chauh hlohin an target hi an um pha.