Cavani match 3 atan an hrem

Manchester United striker Edinson Cavani chu social media-a a thil ziah vangin match thum an hrem bakah £100,000 an chawtir a, an pawisa chawitir hi India pawisa chuan nuai 100 vel a ni.

November 29, 2020 khan Cavani hian Southampton an hmachhawn ṭumin goal hnih a khung a, 2-0 a hnufual tawh Man United chu 3-2 in an chakpui. Uruguayan forward ṭhianpa chuan, "Asi te quiero, Matador", tiin Instagram-ah a dah a, thlalakah Cavani goal khung lawm lai a hmang.

Cavani ṭhianpa thuziak chu, "Hetiang hian ka duh che, Matador," tih a ni a, Matador hi a hminglem a ni. A ṭhianpa hian a goal khung a lawmpuina a ni a, goal khung reng tura a duhsakna a ni ber. Uruguayan forward hian a ṭhianpa hi, "Gracias negrito,"  tiin Instagram Story hmangin a chhanglet a, a awmzia chu, "Ka lawm e, Midum," tihna a ni.

Man United forward hian ṭawngkam mawi lo  - chi leh chi inthliar a ni tih a hre lo a, a nih thu an hrilh veleh Instagram Story-a thlalak hman hi a la thla nghal. Amaherawhchu England-a football thuneitu sang FA beng a thleng a, December 17, 2021 khan thiam loh an chantir a, zanin khan a hremna an ti chhuak.

Cavani hian January 1, Inrinni zana Aston Villa an hmachhawn hunah a tel thei dawn lo a, Manchester City nen January 6-a League Cup semifinal leh FA Cup third round-a Watford nen an inkhelh hunah a inlan thei lo ang.