Strachan aiin Southgate a dingchang England 3 - 0 Scotland

Zirtawpni zan khan England chuan World Cup qualifier-ah 3-0 in Scotland an sawp a, England manager nghet ni tura Gareth Southgate dinhmun a ṭhat rualin Scotland manager Gordon Strachan dinhmun a derthawng thung.

Wembley-a team pahnih inhmachhawn hmain inkhel hi manager pahnih dinhmun hril thei tur a nih thu chu khawthlang media-te titi tui ber a ni a, Southgate-a dinhmun sawhnghehna turin England-in hun an duh rei lo. Daniel Sturridge chuan minute 23-naah Kyle Walker ball cross chu
ṭha takin a tauh lut a, Liverpool ma-nager Jurgen Klopp hnenah ngaihthah chi a nih loh zia khel-muala a che vel hmangin a hriattir.

England-in an goal hnihna khung turin second half an nghah thlen a ngai a, goal khungtu chu Liverpool player bawk a ni - Adam Lallana chuan Danny Rose-a ball cross chu Sturridge-a khung ang deuh chiahin a tauh lut. Scotland-in Lallana goal khung hma hian James Forrest leh Robert Snodgrass hmangin hun ṭha nei mah se goal-ah an chantir thei lo a, Gary Cahill-a'n minute 61-naah Wayne Rooney ball cross chu goal-ah a chantir leh bawk si avangin mikhual team-in tih theih an nei lo.

Southgate a tlingtawk!

England-in hnehna an chang a, a hnua sawi hlawh ber chu Football Association-in Southgate hi England manager nghet turin an ruai ang em? tih hi a ni. England captain Wayne Rooney chuan, "Southgate hian a theihna zawng zawng a pe a, ka ngaihdanah chuan England manager nghet ni tura dinhmun ṭha ber chu ani hi a ni," tiin an manager lailawk chu a fak hle.

English chanchinbu lar Mirror Sport chuan 'Southgate dinhmun a nghet ta' tih chu headline atan an hmang a, The daily Telegraph chuan 'Hna chu i ta a ni ta e, Gareth' tih an hmang a, The Times chuan Daily Telegraph headline ang chiah hi hmangin The Guardian chuan 'Ropuina lamtluang zawhin, hnehna hmangin Southgate-a'n a dinhmun a sawhnghet' tih an hmang thung.

Scotland lam erawh an lung a awi thei ngang lo. An chanchinbu lar 'The Scottish Daily Record' chuan chanchinbu kawmah 'A zahthlak, a mualphothlak, a rilru natthlak, thlalak dah thei pawh kan ni lo' tiin thlalak pawh an dah lo a, a hnuaiah 'hetichung chunga i chhiar duh a nih erawh chuan a chhung keu rawh...' tiin an ziak!

Southgate thukhawchang

England manager Gareth Southgate chuan, "Ka lawmna em em chu hna hautak ber thawh a ṭul laiin koh ka ni a, chutiang dinhmun karah chuan hna ṭha takin kan thawkin ka hria a, ka hlim em em a ni. Ka hna chanpual hlen mai loh chu kei chuan tih theih ka nei lo a, he hna hi thawh nuam ka ti a ni. Ka kova mawhphurhna innghat hi nuam ka ti a, kan hmaa chona in chhawp zawng zawng kha nuam ka ti em em a ni," a ti.

Kumin chhungin World Cup qualifier khelh tur awm tawh lo mah se England hian Thawhlehni zan khian Spain chu friendly match khel turin an mikhual dawn a, Europe team ṭha laka hnehna an chang leh a nih ngat chuan Southgate-a dinhmun tur hi in zawh nawn kher a ngai tawh lo ang.

Europe - WC Qualification

Inkhel Results

Armenia 3 - 2 Montenegro

France 2 - 1 Sweden

Czech Republic 2 - 1 Norway

Northern Ireland 4 - 0 Azerbaijan

San Marino 0 - 8 Germany

Denmark 4 - 1 Kazakhstan

Romania 0 - 3 Poland

England 3 - 0 Scotland

Malta 0 - 1 Slovenia

Slovakia 4 - 0 Lithuania

Austria 0 - 1 Republic of Ireland

Georgia 1 - 1 Moldova

Croatia 2 - 0 Iceland

Turkey 2 - 0 Kosovo

Wales 1 - 1 Serbia

Albania 0 - 3 Israel

Liechtenstein 0 - 4 Italy

Spain 4 - 0 FYR Macedonia

Ukraine 1 - 0 Finland