MVA Tourney 3rd MAP vs Hunthar VC

Vawiin hian TNT Volleyball Court, Muanna Vengah MVA Invitation Tournament khelh chhunzawm leh tur a ni a, tlai dar 3:00-ah Power Department SC leh Bethlehem VT VC ten hmeichhe semifinal an khel ang a, mipa team ṭha 3rd MAP leh Hunthar VC ten league round an khel zui bawk ang.

3rd MAP hian match hnih an khelh tawhah hnehna an chang ve ve a, an khingpui tur Hunthar hian Assam Rifles 3-0 in an hneh tawh bawk. Pool B hmahruaitu ni thei dinhmuna ding an ni.

MAP lam hian tual-chhung player ṭha an kawl khawm nual a, tun dinhmunah chuan Joel Zodinsanga leh Zo-muanpuia te hi an player pawimawh niin pool hmahruaitu an nih theihna kawngah tha an thawh hnem hle. Tun ṭumah hian Hunthar hian Tamil Nadu tlangval Selva Prabhu leh S. Karthik an chah lut a, India tan pawha khel tawh player pahnih an neih avangin team ṭha berte zinga mi an ni ve bawk.