Germany tan Gnabry hattrick

Arsenal midfielder hlui Serge Gnabry-a'n Germany tana a match hmasa berah hattrick a siam nghal. Germany hian World Cup qualifier-ah San Marino chu 8-0 in an sawp a, Sami Khedira chuan minute sarihna lekah goal hmahruai a khung.

Minute hnih hnu lekah Werder Bremen midfielder Gnabry-a'n Germany tana a match hmasa berah goal a khung nghal a, minute 58 & 76-ah a khung leh bawk avangin Dieter Muller-a'n kum 1976-a Ger-many tana a match hmasa bera goal thum a khung hnua Germany tana a senior match hmasa bera hattrick siam leh thei hmasa ber a ni.

Germany tan Jonas Hector chuan goal hnih a khung ve bawk a, Kevin Volland-a'n goal khat dang thawhin San Marino mualphona belhchhah turin Mattia Stefanelli chuan an lamah a ti lut bawk. Germany hian Group C-ah hmahruai mekin an hnuai chiaha awm Northern Ireland aia an sanna chu point nga lai a ni tawh. Northern Ireland hian Azerbaijan chu Kyle Lafferty, Gareth McAuley, Chris Brunt leh Conor McLaughlin te goal khung hmangin 4-0 in an sawp ve bawk.

Rio Olympic football-a top scorer Gnabry chuan, "Germany tana ka match hmasa bera goal thum khung nghal hi ka beisei ngai lo. Vawiinah hian ka hlim em em a, tun hnai kum hnihah kha chuan harsa ti ṭhin mah ila vawiinah erawh match tam tak khelin goal ka khung a, ka chhunzawm zel theih ka beisei," tiin nipui laia khelhna hmun a chan loh vanga Arsenal chhuahsantu chuan a sawi.