Vineeth-a inlar leh ta

Bengaluru aṭanga Kerala Blasters pantu CK Vineeth-a'n Indian Super League-a a hmel a lan hnuah a hming a chher chhunzawm zel - kum 28 a upa striker hian Chennaiyin FC an mikhualna inkhelah goal hnih khungin Kerala hi 3-1 in hnehna a chanpui.

Chennaiyin tan Ber-nard Mendy chuan inkhel ṭan aṭanga minute 22-na lekah goal hmahruai khung mah se second half-ah Blasters hian goal thumin an chhang let. Substitute Didier Boris Kadio chuan minute 66-naah an si phurh sutin CK Vineeth chuan minute 80 hnu lamah goal hnih a khung ve leh a ni - Kerala chhuak striker hian match hnihah goal thum a khungna chiah a ni.

Mizo tlangval Jeje Lal-pekhlua'n inkhel bul ṭan mah se Hnahthial tlangval hian minute hnihna leka a hun ṭha neih a chhawr ṭangkai thei lo a, Bethlehem rawlthar Jerry Lalrinzuala chuan ṭum dang ang bawkin inkhel bul a ṭan bawk.

Zirtawpni zan ISL inkhelah FC Goa-in hun tawp minute 20 lam Sahil Tavora hnawhchhuah a nih avangin kim loin khel mah se hnual phah nan an hmang duh lo a, minute 90-naa Romeo Fernandes goal khung hmangin an mikhual NorthEast United chu 2-1 in an hneh.

Highlanders tan Sei-tyasen Singh chuan goal hmahruai khung mah se Robin Singh chuan minute 62-naah an si phurh hi a sut a, Romeo goal khung hi injury time-a lut a ni thung - NorthEast United hian an match hnuhnung paliah hneh an tawng ta lo.