Murray leh Djokovic an incho

Nizan aṭang khan 2016 ATP World Tour Finals chu O2 Arena, London-ah khelh ṭan a ni a, world number 1 thar Andy Murray leh champion lai Novak Djokovic te chuan nomawi chawi ngei an tum thu an sawi chhuak.

ATP ranking-a a sang pariatte hi group pahnihah ṭhen hran an ni a, John McEnroe Group-ah Andy Murray, Stan Wawrinka, Kei Nishikori leh Marin Cilic te an awm khawm ang. Ivan Lendl Group lamah Djokovic, Milos Raonic, Gael Monfils leh Dominic Thiem te an awm thung - group match an khelh kual vek hnuah a sang paliin semifinal an lut dawn a ni.

Kum 29-a upa Djokovic chuan, "Player tinin he tournament hi khelh kan châk vek a, he huna inlan theih nih hi inchhuanna tham a tling. Tun hnaia ka khelh dan vangin rinkai ber ni lo mah ila theihtawp ka chhuah dawn a - ka nomawi hloh ka tum lo," a ti.

Grand Slam vawi 12 champion tawh Djokovic hian tun hnaiah world number 1 a nihna chu Mur-ray lakah a chan a, a khelh ṭat ber lai a ni lo. WTA Finals-ah hian a zawnin kum li chhung a champion tawh a, nizan khan a match hmasa berah Thiem hmachhawnin result kan hre hman lo.

Britain tlangval Murray a zam bik lo, "Ka thil tum ber pakhat number 1 nih ka hlen tawh a, hma-bak ka nei tawh lo tihna a ni lo. He hmunah hian a rei thei ang ber awm ka tum a, kan ramah hian champion ngei ka tum," a ti. Murray hian zanin dar 1:30-ah a match hmasa ber atan Cilic a hamchhawn ve thung ang.