Vawiinah National Ranking TT Championship Mizoram tan Hunhlua leh Rinpuia

11Even Sports TTFI National Ranking Table Tennis Championship, 2016 chu vawiin aṭang hian R. Dengṭhuama Indoor Sta-dium, Mualpuiah khelh ṭan a ni dawn.

Mi-zo-ram Table Tennis Association (MTTA) in a vawi khat nan India rama TT inelna lian a thleng a, in-fiammi 758 zet a inlan ang.

National Ranking Cham-pionship-ah hian MTTA hnuai aṭangin player 39 an inlan dawn a, an zingah hian Mizo zinga National Youth champion hmasa ber Lalrinpuia leh All India Inter Institution Championship 2016-a bronze medal latu Lal-hunhlua te an tel.

Table tennis-ah India hi zone pangaah ṭhen hran niin Mizoram thlen tur hi East Zone a ni a, kuminah hian North Zone, Central Zone, Indore Zone leh South Zone te chu khelh zawh tawh niin tun season-ah chuan tun ṭum hi National Ranking Championship hnuhnung ber a ni.

Zone hrang hrangah
ṭhen hran ni mah se ram pum huap inelna a nih avangin India ram hmun tin aṭangin infiammi an kalkhawm ṭhin. Tun ṭumah hian state hrang hrang 26 bakah institution 10
aṭangin infiammi an fuan khawm dawn a, category tinah India number 1 an inlan kim vek dawn.

Inelna hi singles cate-gory 10 - cadet boys, cadet girls, sub junior boys, sub junior girls, junior boys, junior girls, youth boys, youth girls, men's leh women's singles hmangtea inelna neih tur niin category tinah hian Mizo player an inlan kim vek ang. Men's Singles chu hming pe lut tamna ber niin 114 zet an inlan ang - he category bikah hian India number 1 Sathiyan Gna-nasekaran a inlan dawn.

An inpeih

Inelna thleng tur hian MTTA lam chu an in-peih tawh. June thla
aṭang khan he inelnaa inlan tur tualchhung player ṭha thlanna neih niin ranking-a a sang te koh an ni. Head coach R. Lallunghnema kaihhruaina hnuaiah player thlan bikte hian MTTA Hall, Mission Vengah camp an nei.

MTTA president C. Lalrinzuala chuan, "Mizoramin hetiang inel-na lian kan thleng thei tur hi kan lawm a, sorkar in hmunhma ṭha a neih tawh avanga thleng thei kan nih avangin a lawmawm hle. Sports minister Zo-dintlunga kaihhruaina zarah Mizoram TT-in hma a sawn zel kan beisei," tiin Vanglaini palai a hrilh.

Zoram tan...

International level-a medal 20 la tawh Lalrinpuia chuan Mizorama an inkhel thei tur chu chona ṭha tak a nih thu a sawi a; Thailand Open leh El Salvador Open lama silver medal dawng tawh Lalhunhlua chuan mahni ram ngeia inkhel tur an nih avangin a phur thu a sawi bawk.

Ansulgar Academy, Delhi-a inzirlai pahnih hian Mizoram tan theih tawp an chhuah tur thu Vanglaini palai an hrilh zui bawk - an-ni pahnih hi youth leh men's singles-ah an inlan dawn.

Maubawk rawlthar Rin-puia chuan, "Hliam vang-in kuminah ka inkhel tam tawk lo a, player-te hi intluk tawk tak tak kan nih avangin inhneh thei vek kan ni," a ti. 77th Junior and Youth National & Inter - State Table Tennis Championship nomawi kawltu Rinpuia hian national level-ah medal 58 zet a la tawh.

Candelux Open 2016 Junior champion Hun-hlua chuan, "Theih tawp ka chhuah ang, kan theihna leh thiamna te hi Mizoram tan kan hmang dawn," tiin a sawi. New Capital Complex rawlthar hian Sweden-ah world champion vawi nga ni tawh Peter Karlsson kaihhruaina hnuaiah thla hnih chhung training a lo nei tawh.

Mizoram number 1 Lalmalsawma chu men's singles-ah a inlan dawn a, cadet boys-a India number 8 Thangsiansanga bakah National Sub Junior-a silver medal lo la tawh Robert Pachuau a inlan bawk ang - anni pathum hi tualchhunga aṭanga inzir chhuak ni mah se medal la thei tur khawpa theihna nei sang an ni.

Jeho-a hoin

Mizo player zingah Jeho Himnakulhpuingheta leh Alberto Lalremruata bakah John Zamliana te chu an inzir mekna Petroleum Sports Promo-tion Board, Ajmer tan Sub Junior-ah an inan dawn. Haryana tan H. Lal-ruat-sanga (cadet boys) leh Roluahpuia (sub junior) te a inlan dawn bawk.

National Child Award for exceptional Achieve-ment 2015 dawngtu Jeho-a chuan, "Ka ban hliam vangin tun hnaiah beisei ka phak lo deuh. Mahse, Pathian kutah ka innghat a, theihtawp ka chhuah ang," tiin Vanglaini palai a hrilh.