Badminton champion Tuikual
Mizoram chhunga badminton inelna lian ber, Hrangbana Memorial 2nd Mizoram Badminton League-ah Tuikual Shuttlers an champion.
Zirtawpni zan final-ah Tui-kual Shuttlers-in an khingpui Mission Veng chu 3-1 in an hneh a, Electric Veng YMA Hall-ah Tuikual mipui thawm a ring hle. Tuikual tlangval Lalduhawma (Lalmama) chu player of the tie-a thlan a nih bakah player of the league a thlan a ni bawk.
Tuikual an chungnung
Final hi men's doubles aṭanga ṭan a ni a, Mission Veng tana inkawp RK Manajit Singh leh Abhishek Yeligar ten an intawn hmasak ṭumin Tuikual tana inlan Neeraj Vashisth leh Lalmama te chu an hneh tawh a, tun ṭumah pawh chak zawk tura ngaih an ni. Mission Vengin game hmasa ber la nghal mah se game hnuhnung pa-hnihah 'concentration hloh' lo zawk Tuikual lamin hnehna an chang ve ve a, match hmasa ber an la.
Neeraj leh Lalmama te chakna hi men's doubles-a hnehna satliah a ni lo a, he chakna vang hian Mission Veng hian nomawi an chan nghalah a ngaih theih bawk.
Mixed doubles-ah Lalmama inlan leh nghalin a kawppui Mizo-ram hmeichhe number 1 Lalrinzuali nen harsatna nei loin Mission Veng tana in-kawp Johny Lalhlimpuia leh Hming-thianghlimi te an hneh a, Tui-kualin 2-0 in hma an hruai nghal.
Match thumnaah Mission Veng hun a thleng a, Abhishek-a'n rin lawk ang ngeiin Tuikual aiawh H. Lalawmpuia a hneh. Men's singles-a hnehna hi Mission Veng tan beiseina siamtu ni bawk mah se inkhelh hmabak thlirin mualphona hliah khuhna ang chauhah a ngaih theih a, Abhishek hian theihna sang tak a neih miau avangin singles-a a hnehna chan hian doubles-a a chet ṭhat tawk loh a thup zo lo a tih theih bawk.
Final hmaa chak zawk zawnna tura ngaih 35+ men's doubles chu match linaah khelh a ni a, Tuikual tana inlan Lalbiakmawia leh Lalbiaknia te chu Mission Veng aiawh Lalrindika Ralte leh Albert Lalnunhlima ten an tluk lo deuh. Tuikual-in hnehna an chan leh tak avangin deciding match khelh a ngai lo a, Badminton Association of India number 1 Neeraj Vashisth che vel hmu châk tan chuan MBL2 final tawp dan chu a famkim lo deuh ang.
A ropui tho tho
Tuikual mipuiin hnehna an chan avangin 'Phengphehlep ṭial mawi te, phengphehlep ṭial mawi te, Tuikual a hrut del del, ti rawh le' tiin Electric Veng hall-ah an zai rual a, Mission Veng mipuiin chak lo mah se an puitlinna lan-tirin a khingpuite hla hi an lo zawm ve dual dual bawk.
MBL hmasa berah Hlimen an champion a, player of the league-ah hneh loh tawng lo Kulikawn Panthers player Daniel S. Farid thlan a ni. Tun ṭumah Tuikual an cham-pion a, player of the league-a an veng neitu tlangval leh champion-na kawnga player pawimawh Lal-mama thlan a ni hi a inhmeh hle.
Tuikual Shuttlers 3 - 2 in an chak
Category Mission Veng Tuikual Shuttlers Game
MD Abhishek Yeligar & Lalduhawma & 15 - 10, 14 - 15, 12 - 15
RK Manajit Singh Neeraj Vashishth
XD Johny Lalhlimpuia & Lalduhawma & 7 - 15, 8 - 15
Hmingthianghlimi Lalrinzuali
MS Abhishek Yeligar H. Lalawmpuia 15-12, 15 - 4
35+ MD Lalrindika Ralte & Lalbiakmawia & 10 - 15, 12 - 15
Albert Lalnunhlima Lalbiaknia
MS RK Manajit Singh Neeraj Vashisth
Player of the Tie - Lalduhawma (Lalmama), Tuikual