Tlai dar 3:00-ah Chanmari Derby Player pahnihin Dampuia an veng ang - Chanmari coach

Chanmari FC-in an ṭhenawm Chanmari West hneh loh hrehawmzia September 30 khan an hre tawh a, club pahnihin semifinal an la luh loh bawk avangin vawiin tlai dar 3:00-a Chanmari Derby a hmuhnawm khawp ang.

Mizoram Premier League Season 5 champion tumin Chanmari FC-in foreigner pahnih Leonce Dodoz leh Ugochukwu Godswill telin Chhinga Veng lakah point khat chiah an hlawh chhuak a, an khingpui tur West Warrior-in Dinthar an draw bawk.

Chanmari boss Lalsangzuala Hmar chuan an ṭhenawm club an hmachhawn hunah an foreigner pahnih an chhawr theih a beisei a, top scorer ni mek Laldampuia an ven uluk tur thu a sawi bawk.

Ven ngai Dampuia

Kawrtethawveng tlangval Laldampuia'n goal sarih khung tawhin MPL5-ah a la pet goal tam ber a, man of the match-ah vawi li zet thlan a ni tawh bawk. Chanmari West captain Dampuia hian derby match-ah goal hnih a khung a, Malsawmfela goal khatin Chanmari a chhan zo lo.

Chanmari FC coach Sanga chuan, "Kan intawn hmasak zawk khan ka player zingah ka sawi ang lo deuha khel an awm avangin Dampuia'n goal a khung phah. Kan intawn leh hunah erawh uluk takin Dampuia hi kan veng dawn a, ball a chan velah player pahnih zelin an veng hman tawh tur a ni," tiin Dampuia an ven fimkhur tur thu a sawi.

Sanga chuan sawi chhunzawmin, "Dodoz hian hliam tenau deuh chu a nei a, a khelh leh khelh loh chu a huaisen leh huaisen loh a ni tawh mai. Chanmari West lakah chak ngei ngei kan tum a, chak loh erawh a thiang lo," tiin player talent nei ṭha Dodoz chu a dam phawt chuan chhawr a tum thu a sawi.

Chak tum West Warrior

Chanmari West-in Champhaia Aizawl FC an hneh hnuah match li an khel leh tawh a, Ramhlun North lakah chiah an point thum an hmu. West Warrior-in match hnuhnung pathumah point khat chiah an hlawhchhuah avangin semifinal lut turin an dinhmun a derthawng.

West Warrior coach HC Zarzoliana chuan, "Hneh turin theihtawp kan chhuah ang. Chak kan mamawh ber tawh a, chak loh chuan semifinal lut lo thei kan ni. Kan rilruah draw lam a lang tawh lo," tiin chak ngei ngei an tum thu a sawi.

Vawiin tlai inkhel hi a hmuhnawm ang.

Team Dinhmun

# Team Pld W D L GF GA GD Pts

1 Bethlehem VT 11 7 2 2 12 8 4 23

2 Chanmari FC 11 5 5 1 19 10 9 20

3 Aizawl FC 11 6 1 4 11 7 4 19

4 Chanmari West 11 5 2 4 14 10 4 17

5 Dinthar FC 11 2 6 3 12 16 -4 12

6 Ramhlun North 11 3 2 6 10 16 -6 11

7 Chhinga Veng 11 2 4 5 14 16 -2 10

8 Zo United 11 1 4 6 6 15 -9 7