Zan lamah Relegation Battle

Mizoram Premier League kai thar Ramhlun North-in point 11 an hmu tawh a, zanin dar 7:00-a an khingpui tur Zo United-in point 7 an hmu thung. Club pahnih inthlauhna hi point li chauh a ni nachungin match thum chauh khelh tur a awm tawh avangin Zo United tan table mawngphah chhuahsan turin chak ngei ngei a ṭul tawh.

Zo United technical director James Khamliansawma chuan, "Aizawl FC kan khelh anga kan khelh chhoh theih chuan kan hmabak match thumah hian point kua kan hmuh theih kan la beisei ve tlat a ni," tiin a sawi a, an khelh dan thlirin a thusawi hi a dik a ni.

Aizawl FC an hmachhawn ṭumin Zo United-in goal khung theihna tur chance ṭha vawi nga an nei a, AFC keeper Zothanmawia chet ṭhat ni an tawn miau avangin point an hlawh chhuak lo. Amaherawhchu Zo United hi match zawnin vawi li an chak tawh lo a, Ramhlun North laka an chak lo a nih chuan tun season-a chak lo rei ber Chhinga Veng record an khum chiah ang.

Ramhlun North hi an match hnuhnung berah an vanduai ve tho a, MPL kaithar hian Bethlehem Vengthlang lakah sawi zui theih tur penalty an chawi. Lalruatliana Sailo hote hian season tawp thlenga tla thei dinhmuna din pumpelh nan chak an mamawh a, Nigerian striker Oneyeama Francis bakah veng mipui ṭawiawm ṭha an mamawh ang.