Players rilru put hmang a inthlak - Solskjaer

Manchester United manager Ole Gunnar Solskjaer chuan player rilru put hmang inthlak chu Premier League-a pahnihna dinhmun an luah theihna chhan a nih thu a sawi.

Zanin dar 1:30 hian Man United-in Aston Villa an mikhual ang a, hnehna an chan theih chuan hmahruaitu Liverpool nen khelh zat inangah an point hmuh zat a inang dawn. 

Norwegian manager Solskjaer chuan, "Kan za vai mai hian sulhnu nei ṭha leh club ropui Man United-a awm kan duh a, nuam kan chuan hun duhawm tak kan chan chhunzawm theih ka beisei," tiin a sawi.

Tun season hi Sir Alex Ferguson-a'n kum 2013-a team enkawl hna a chawlhsan hnua Manchester United-in tun ang huna pakhatna an hnaih leh ber ṭum a ni a, amaherawhchu nomawi chawi erawh a la harsa dawn.

Solskjaer chuan, "Player rilru paukhauh tak tak kan la lut a, hei hian nghawng ṭha tak a nei a ni. Chutihrualin nomawi chawi dan hre tawh  Juan Mata leh Nemanja Matic te kan kawl a, an khelh miah loh pawhin team tan an thawh hlawk. Team chhunga inlena ṭha tak a awm a, ti tak tak tan loh chuan khelhna hmun chan a harsa bawk," tiin team chung inelna boruak a ṭhat thu a sawi.

Man United khingpui tur Aston Villa hian an match hnuhnung berah Chelsea an chelh thei a, Liverpool 7-2 in an sawp tawh bakah Leicester City (1-0) leh Arsenal (3-0) te an hneh tawh avangin an inkhelhna tur hi Old Trafford ni mah se  point thum hmuh a awlsam lo ang.