Chanmari FC-in semifinal an lut
Chanmari Derby-ah Malsawmfela goal hnih hmangin Chanmari FC-in Chanmari West 2-1 in an hneh a, point 23 hmuin Mizoram Premier League Season 5 semifinal an lut.
Nimin tlai inkhel hmuhnawm takah hian Sawmfela goal hnih khung tur siam saktu Leonce Dodoz chu man of the match-ah thlan a ni a, West Warrior tana R. Laldanmawia goal khungin result a thlak danglam lo.
Inkhelh ṭan hma hian Chanmari West suppporter inkhel ennaa nunna chân Lallawmkima sunna hun neih a ni bawk.
Top Scorer Sawmfela
Chanmari FC-in Malsawmfela an nei a, Ramhlun South tlangval hi ṭan phat aṭangin Chanmari West tlarhnung tan hnawksak a tling.
Minute 21-na lekah Leonce Dodoz-a thawhrah sengin Sawmfela'n goal hmahruai a khung a, Chanmari forward finishing ṭhatzia a lan ang chiahin ball petu Ivorian forward Dodoz fak loh a thiang lo. West Warrior-in goal an chhuah hma an tuar a, left back Vanlalzuia Hnamte ball hloh vanga goal a ni.
Chanmari FC khel ṭha lo zawkah ṭang mah se minute 82-naah Ivorian forward Dodoz-a thiamna a lang nawn a, counter attack hmangin West Warrior tlarhnung an chhu lêt. Dodoz hian vei lam kilah chak takin ball a la lut a, lei hrula ball ṭha tak pet lutin Sawmfela'n mawi takin a khung.
Sawmfela'n tun season-a MPL goal 100-na a khung a, Chanmari forward hian MPL5-ah goal riat a khung tak avangin top scorer a ni chiah bawk.
West Warrior an vanduai
Chanmari West-in goal an chhuah hnuah an insiamṭha a, Danmawia pass ṭha tak chu PC Lalawmpuia'n goal ban pet per nan a hmang a. Lengpui tlangval Lalmuanzuala ball pet chu an khawih per hnuah crossbar chungah chiah a kal a, Danmawia leh Lalbiakhlua ten chance ṭha an hlah bawk.
Second half-ah pawh Chanmari West-in chance ṭha an nei a, Hlutea leh Muanzuala inringthulin ball ṭha tak chu goal-ah a chantir thei lo. Hun tawpah erawh Chanmari West-in an phu ang ngeiin goal an khung tho a, Muansanga thawhrah sengin Danmawia'n goal ṭha bik a khung.
West Warrior-in injury time-ah goal an khung chauh avangin point hlawh chhuak turin goal dang khungna hun an nei lo.
Chanmari nge nge an tlo a, an player-te an 'class' bawk a, chance hnih insiamin an khung ve ve a, semi final an lut fel ta.
Eng nge an sawi?
Chanmari FC coach Lalsangzuala Hmar chuan, "Semifinal kan thlen avangin ka lawm a, kan match hmabak pahnihah pawh a ṭha thei ang berin kan khel ang. Inthlahdah hi ka duh lo a, tun ai hian point hmu tam pawh ni i la, ṭha takin kan khel tho ang," tiin theihtawp an chhuah zel tur thu a sawi.
Chanmari West FC coach HC Zarzoliana chuan, "Chanmari aṭanga Reuben kan lakluh khan a club hlui hmachhawna chhawr min phalsak lo a, hetiang hi chu thleng tawh lo se ka ti hle. Lianzama hi Bank-a thawk a nih avangin chawlh a la thei lo a, kan chhawr thei lo a ni. Chanmari hi hneh lo mah ila, semifinal chu kan la lut tho ang," tiin an ṭhat theih dan bera an khelh loh thu a sawi.
Tute nge inlan?
Chanmari West FC (4-1-4-1) : Lalruatpuia; Racy K. Lalremruata, R. Lalawmpuia, Toky Zomuanpuia, Vanlalzuia Hnamte; K. Lalnunzama; R. Laldanmawia, Lalbiakhlua, Lalmuanzuala, Laldampuia; PC Lalawmpuia (Lalmuansanga 32').
Chanmari FC (4-3-3) : F. Lalmuanawma; MS Dawngzela, Ugochukwu Godswill, Lalrinchhana, Ramfangzauva; R. Malsawmtluanga, Rochhingpuia, Lalrinchhana; Isak Vanlalruatkima (Lalmuanzova 45+1'), Malsawmfela, Leonce Dodoz.
ZoFooty Statistics
Dinthar FC 1-1 Chanmari West
DFC : Balogun Hammed 63' (P)
CWFC : Laldampuia 11'
MoM : Laldampuia, CWFC
48% Ball Possession 52%
13 Shots 23
3 On Target 6
2 Yellow Cards 2
0 Red Cards 0
Powered By Rainbow Multibrand
Mobile Showroom