Huaisen takin Djokovic a chak

Novak Djokovic-a'n season chawhnu lam a hman ṭhat tawk loh avangin sawisel a hlawh a, ATP World Tour Finals-a a match hmasa berah pawh auh el a tawk. Serbian tlangval hian amah sawiseltute karah huaisen takin Dominic Thiem chu 6-7 (10-12), 6-0, 6-2 in a hneh.

O2Arena, London-a inkhelah Djoko-vic hian a set khatna hloh mah se a talbuai chhunzawm lo a, set hnuhnung pahnihah game hnih chauh hloh chungin hnehna a chang.

Grand Slam vawi 12 cham-pion tawh Djokovic hian tun hnaiah Andy Murray lakah world number 1 a nihna a hloh a, ATP World Tour Finals-ah hian league round paltlang tur chuan a chhe berah vawi hnih tal hnehna a chan a ngai - tun ṭumah hian a champion leh a nih chuan number 1 ni chungin season a khar thei dawn a ni.

Kum 29-a upa Djokovic chuan, "Set hmasa berah match point ṭum ruk a hmuh ka pawt khawtlai thei a, a tawpah erawh ka chelh thei ngang lo. Set hnuhnung pahnihah erawh duhthusama ṭhain ka khel thung," tiin a sawi.

Ivan Lendl group match inkhel dangah Wimbledon finalist Milos Raonic chuan Gael Monfils lakah 6-3, 6-4 in hnehna a chang ve bawk. Canadian star hian set pahnihah hian French tlangval service hi ṭum khat ve ve chhuhsakin harsatna tawk loin hnehna a chang.