Sangliana a inringtawk

Mizoram Wresling Association chuan Nilaini hian Lam-mualah Mizo Inchai (Title fight 2016) a buatsaih dawn a, palian champion lai Lalsangliana, S/o PC Lalrinmawia (L) Upper Republic chuan Saitual tlangval PB Lalnienga laka a champion kawnghren humhim tura a inpeih thu a sawi chhuak.

Kuminah hian palian bak-ah palaihawl champion nih inchuh turin Kolasib tlangval Lalmalsawma leh East Lungdar fachuam R. Lalrinawma te an innuai dawn bawk. Pate champion lai Saitual tlangval Lalchhanhima hmachhawn turin kum 2014-a a lo hneh tawh Lalawmpuia a lokir leh dawn bawk. Inchai hi chawhma dar 10:00 aṭanga ṭan tur niin round 10 vek tur a ni thung.

Upper Republic tlangval Sangliana chuan, "Ka taksa a fit ṭha tawk a, Mizoram excise department lamin coach leh manager ṭha tak min rawih sak a, anni kaihhruaina hnuaiah training ṭha taka kan neih avangin ka champion kawnghren humhim theih ngei ka inring," tiin a sawi.

Sangliana hian inchai bakah wightlfting lamah pawh sulhnu a nei ṭha tawh a, national cham-pion-ship-ah pawh silver medal a lo la tawh. Kumin July thlaa 9th Mizoram Powerlifting Champion-ship-ah pawh khan squat (265 kg), benchpress (176 kg) leh deadlift (245kg) chawiin 105kg category-ah Mizoram champion a ni. Mizo palian inchai champion lai rit chawite hi Mizoram powerlifting record thar a ni vek bawk.

Lalsangliana hian kum 2009 khan wrestling hi luhchilh ṭanin state level-ah gold 14 leh silver 2 a la tawh. North East level-ah gold pahnih leh Inter SAI-ah gold pakhat a la tawh bawk.

Palian champion thar nih tum Lalnienga a zam bik lo, "Mizoramin champion thar a hmu ang," tiin palian champion thar nih ngei a tum. Saitual Wrestling Association hminga inlan tur Nienga hi tun hmain palian title fight-ah ṭum hnih a lo inlan tawh a, a vanduai zawkah a ṭang ve ve - tun ṭumah erawh tun hma lama a tih theih ngai loh tih a tum ruh hle.