Remsiami telna India zin chhuak dawn

Olympic khel tura inbuatsaih lai India hmeichhe hockey team chuan kumina an hmalakna hmasa atan Argentina ramah an zin chhuak dawn. South American team hi an senior bakah junior team an hmachhawn ang.

India tan hian player 25 zingah Lalremsiami Hmar pawh a zin chhuak dawn. January 1 khan player zin chhuak tur hi Delhi-ah an thleng khawm kim. January 2, vawiin hian Argetina panin an chhuak dawn a ni.

Mizo nula Remsiami awmna India team hian international match an khelh hnuhnung ber chu 2020 February thla daih tawh kha a ni a, hetah hian New Zealand chu 3-0 in an hneh.

Coronavirus vangin inelna a awm zui thei lo a, tournament khelh thei lo mah se Tokyo Olympic khel tur an nih avangin Bengaluru-ah training an nei reng a, kumtir aṭangin inbuatsaihna hautak zawk an nei zui leh nghal dawn tihna a ni.