Hamilton-a'n nomawi beiseina chhi nung zel

Formula 1 champion lai Lewis Hamilton chuan awlsam taka a nomawi hloh mai a tum lo. Mercedes driver hian Pathiannia tlan zawh tak Brazilian Grand Prix-ah hnehna changin a teammte Nico Rosberg nen an inthlauhna chu point 12 chiah a ni ta.

Brazil-a intlansiakah hian German driver Rosberg hian hnehna chang ni sela chuan a vawi khat nan champion nomawi a chawi thei dawn a, mah se a duhthusam a la thleng dik thei rih lo. Rosberg hi pahnihnaah thlengin a hnungah hian Red Bull driver Max Ver-stappen a thleng ve bawk.

Kuminah intlansiak hmabak pakhat chiah an nei tawh a, November 27 khian Abu Dhabi Grand Prix an tlan ang. Rosberg tan champion nomawi chawi turin Abu Dhabi-ah hian hnehna chan kher a ṭul dawn lo a, pathumna chin nih a tawk ang.

Kum 31-a upa Hamilton chuan, "Ruah a sur khan driver zawng zawng tan thil awlsam a ni tawh lo a, ka tan kha kha malsawmna a ni thung. Kei chuan kawng huh leh nala intlansiak hi nuam ka tiin chona ṭha takah ka ngai," tiin a sawi.

Hmailton chuan sawi chhun-zawmin, "Tunah hian ka team lamin duhthusama ṭha car min pe a, ka taksa a hrisel ṭhain inrintawkna ka nei sang bawk- ka tih theih pawimawh chu Rosberg um zel hi a ni," a ti.

Intlansiak hmabak pathum chiah a awm tawh tih khan Hamilton hian Rogberg a phak lohna chu point 33 zet a ni a, a zawna hnehna a chan tak avangin tunah chuan beiseina a nei sang leh ta hle. Sao Paulo bikah hian tun hma lamin hnehna a la chang ngai lo a, tun ṭum hi a vawi khat chakna a ni nghe nghe.

World champion vawi thum ni tawh Hamilton hian Formula 1 inelnaah hian vawi 52 hnehna a chang tawh a, Alain Prost-a record vawi 51 hnehna chan chu a khum tak avangin driver pakhat chiah tluk loh a nei tawh. Hnehna chang hnem ber Michael Schumacher (91) tluk tur erawhin hmabak a la ngah hle.

Rosberg chuan, "Lewis kha a tlan ṭha takzet a, pakhatna nih kha a phu hle. Kawng ro ṭha taka intlansiak kan nih loh avangin a harsa hle a, pahnihna nih hi ka tan thil ṭha tak a ni," tiin a sawi.

Brazilian Grand Prix Results

# Driver Ram Team

1 Lewis Hamilton GBR Mercedes

2 Nico Rosberg GER Mercedes

3 Max Verstappen NED Red Bull

4 Sergio Perez MEX Force India

5 Sebastian Vettel GER Ferrari

6 Carlos Sainz Jr ESP Toro Rosso

7 Nico Hulkenberg GER Force India

8 Daniel Ricciardo AUS Red Bull

9 Felipe Nasr BRA Sauber

10 Fernando Alonso ESP McLaren