Mahuma Memorial Cricket Luangmualin hnehna an chang nghal

Cricket Association of Mizoram buatsaih Mahuma Memorial Cricket Tournament chu nimin khan Suaka Memorial Cricket Stadium, Sihhmuiah khelh ṭan a ni.

Nimin khan Tlangnuam leh Luangmual ten inelna match hmasa ber khelin Luangmual hian wicket khatin hnehna an chang. Tlangnuam hian over 30.5 ah run 86 siamin an out vek a, run 20 siamtu Andrew Lalhmachhuana chu Tlangnuam tana run siam hnem ber a ni. Luangmual tan over 40 an neih aṭanga target run 87 siam thil harsa niin lang lo mah se beisei erawh an phak bik lo a, over 27.3-a wicket kua hlohin target hi an tlin thei hram a ni.

Bowling lamah Luangmual tan over riat a vawma run 10 chiah pea wicket thum latu Lalrinchhana a che ṭha fal hle a, Tlangnuam tan Jeremy Lalhruaitluanga chuan over riat a vawmah run 32 pein wicket li la ve bawk mah se a team a chhanhim zo chuang lo.

Inelnaah hian CAM hnuaia first division club pariat Tlangnuam CC, Luangmual CC, Chanmarians CC, Ramhlun Venglai CC, Lords CC, Kulikawn CC, Chaltlang SC leh Chhinga Veng CC te an tel a, an vai hian vawi khat ṭheuh an inkhelh kual hnuah a sang paliin semifinal an khel ang.

Mahuma Memorial Cricket-a a sang pali hi tualchhung cricket inelna sang ber Mapuia Cricket League khel turin an tling nghal a, match khat hi over 40 zela khelh tur a ni.

Vawiin chawhma dar 9:15 hian Chanmarians CC leh Ramhlun Venglai CC te an inkhel ang a, ni khatah match khat zel a awm ang.