Peru hmachhawn tur Brazil inpeih

World champion vawi nga ni tawh Brazil-in coach Tite kaihhruaina hnuaiah inrintawkna sang tak nen 2018 World Cup qualifier an khel mek a, Nilaini zing dar 7:45-ah Peru an lenchilh ang.

Brazil hian match 11 khelh aṭanga point 24 hmuin hmahruaitu an ni mek a, an match hnuhnung berah Argentina 3-0 a an sawp theih avangin inrintawkna an neih belh ang tih a chiang. Coach thar Titi-a'n a enkawl hnuah Brazil hian match nga khel tawhin hnehna an la chang fai vek.

Captain Neymar-a'n Argentina lakah ram tana a goal 50-na a khung a, Peru lakah hian a sulhnu ṭha belhchhah leh ngei a tum ang. Barcelona defender hlui Dani Alves tan ram football-a bung thar ziahna hun ṭha a ni dawn a, a inlan a nih chuan ram tan match 100 a khelh tlinna chiah a ni bawk ang.

Juventus defender Alves chuan, "Tite hian hun rei lote chhungin team boruak a thlakthleng a, tunah chuan eng team pawh hneh thei tur khawpin kan ṭha tawk," a ti. Kum 33-a upa Alves hian Brazil tan match 99 khel tawhin goal sarih a khung tawh.

Nilaini zing dar 5:00 hian Argentina chuan table-a pathumna Colombia an lo mikhual dawn. Brazil laka mualpho hlim Lionel Messi leh Argentina tan insiam-
ṭhatna hun ṭha a ni ang.

Argentina coach Edgardo Bauza chuan, "World Cup khel lo turah ka indah chhin ngai lo a, Russia-ah hian kan kal lo ang tih hlauhthawnna ka nei lo. Point kan hloh avangin ka lungngai ngei mai a, chutihrual erawh chuan a pawimawh ber chu kan inkhelh hmabak a ni zawk," tiin a sawi.

Nilaini Zing Inkhel Tur

Chile 05 : 00 Uruguay

Argentina 05 : 00 Colombia

Peru 07 : 45 Brazil