Latvia ngam loh Ronaldo
Portugal captain Cristiano Ronal-do-a'n a hnathawh ṭhin pangngai bawk a thawk chhunzawm leh ta - Real Madrid forward hian Pathianni zana Latvia nen World Cup qualifier an khelh ṭumin goal hnih a khung a, a team hi 4-1 in hnehna a chanpui.
Kum 31-a upa forward hian minute 28-naah penalty aṭangin Portugal goal hmasa ber a khung a, second half-ah penalty aṭanga goal khungna hun ṭha dang nei leh mah se a hlah thung. Latvia-in rin loh takin midfielder Arturs Zjuzins hmangin an si phurh sut mah se European champion chhaih kawlhna goal mai a ni.
Mualneitu team tan William Carvalho chuan minute 69-naah an hmahruaina goal a tauh lut a, Ronaldo chuan hun tawp nan minute nga chiah a awm tawh tihin a volley goal ve leh bawk. Portugal-in an la duhtawk lo cheu a, Bruno Alves chuan injury time-ah an chak nemgheh nan a khung ve leh bawk.
Ronaldo a kal zel
Sporting Lisbon aṭanga a career ṭantu Ronaldo-a'n ram tan match 136 khel tawhin goal 68 a khung a, Europe khawmualpui player zingah ram tana goal khung hnem palina dinhmun luah turin amah ang thoa ram tana goal 68 khungtu Gerd Muller leh Roobie Keane te chu a nihrual.
Portugal captain hian Europe-a ram tana goal khung hnem ber din-hmun luah turin Ferenc Puskas (84), Sandor Kocsis (75) leh Miroslav Klose (71) te chiah a phak tawh lo a, goal khung hnem ber ni turin a dinhmun a ṭha hle. Khawvel huap ngaihtuah erawh chuan Ronaldo-a'n kawng zawh tur a la ngah hret a, Iran striker Ali Daei a la phak lo. Bayern Munich striker hlui hian ram tan match 149 a khelhah goal 109 a khung thei a ni.
Santos thukhawchang
Portugal boss Fernando Santos chuan, "First half-ah kan theihna kan pholan theih loh avangin kan buai a, ball chang tam mah ila game siam danglam tura kan tlanpui theih tawk loh avangin kan buai a ni. Chawlhlawk laiin ka player-te bulah an tih tur ka hrilh a, second half-ah kha chuan game kan ṭan ṭha sawt. Chance kan insiam a, kan game pawh a rang. Goal chhuah mah ila kan insiamṭha nghal thei a ni. Sub-stitute Ricardo Quaresma tlan luh hnuah kan game a danglam a, inkhel thlak danglam bertu chu ani kha a ni," tiin Besiktas midfielder a fak.