Zanin dar 7:00-ah Chhinga Veng Vs BVT Kan vanduai a nih loh chuan kan chak ang - Chawnga
Mizoram Premier League Sea-son 5-a semifinal lut hmasa ber chu Bethlehem Vengthlang FC an ni a, chu ti chung chuan coach Lalbiaksanga Colney-in pakhatna nih pawimawh zia a hriat avangin chak ngei an tum thu a sawi.
Zanin dar 7:00 hian BVT-in tla thei dinhmuna ding Chhinga Veng an hmachhawn dawn a, MPL kaithar hian semifinal an la beisei tel tho avangin chak ngei an tum bawk.
MK-a OUT, Mapuia IN
Chhinga Veng tan winger H. Lalmuankima a rawn khel ṭha chho a, amaherawhchu Bawngkawn tlangval MK-a hi Chanmari FC nen an inkhelh ṭuma hnawhchhuah a nih avangiin a inlan thei dawn lo.
MPL kaithar tana thu lawmawm chu striker Lalkhawpuimawia chu chhawr theih turin squad-ah dah a ni dawn a, Kelkang tlangval Mapuia hi bul ṭantir a nih erawh a rinawm loh.
Chhinga Veng coach Chawng-thansanga chuan, "MK-a hi a chet ṭhat lai a ni a, a awm loh chu kan tuar ve ngei ang. Amaherawhchu Mapuia squad-ah a awm thei dawn a, kan player dangte inkhel tlak vek an nih bawk avangin chhuanlam siam nan kan hmang lo ang," tiin Vanglaini palai hrilh.
Kan chak ang - Chawnga
Chhinga Vengin tun hnaiah game-ah hmasawnna hmuh tur nei mah se an match hnuhnung pa-hnihah Ramhlun North leh Chanmari an draw a. Chutihrualin MPL kaithar tana thu lawmawm chu an striker MS Dawngliana'n goal khung thei striker a nihzia a lantir leh tawh a, match hnuhnung pa-hnihah goal ṭha bik a khung ve ve.
Chawnga chuan, "Kan chak ka beisei a, chak thei dinhmunah kan ding. Kan vanduai a nih loh chuan kan chak ang. Kan team tan chuan captain Joseph hi a pawimawh a, kan khelh ṭhat leh ṭhat loah ani chet ṭhat leh
ṭhat loh hian nghawng a nei a ni," tiin chak turin an captain a pawimawh thu a sawi.
BVT chungchang sawiin Chawnga chuan, "BVT hi team ṭha tak an ni a, chutihrualin an vannei tel bawk. Tuna team dang nen an danglamna chu pressure an nei tawh lo a, an inringtawk bawk," tiin a sawi.
A ṭha ber zelin
Bethlehem Vengthlangin an match hnuhnung berah Ramhlun North an hneh a, player thlak danglam tam an tum lo - an ṭhat theih dan berin an khel dawn.
BVT boss Lalbiaksanga Colney chuan, "Pakhatna pawi-mawh zia hi kan hria a, he dinhmun nemnghet tur hian theihtawp kan chhuah dawn. Kan ṭhat dan berin kan inrem zel ang a, Samson-a pawh player ṭha tak ni mah se starting eleven khel tur chuan a la inzuam lo. Kan ṭhat dan ber hi a la inthlak thei a, kan inkhelh huna kan ṭhat dan ber zelin kan khel ang," tiin point thum hmu tura an khelh tur thu a sawi.
Armed Veng pachal BS-a hian an khingpui tur Chhinga Veng chu club ṭha tak an nih thu a sawi tel a, chutihrualin pressure an neih tam ve loh avanga an dinhmun ṭhat zawk thu a sawi zel bawk.
Entu lam boruak
Semifinal an thlen chian tawh avangin BVT team boruak a ṭha a, inkhel entu pawh an ṭhahnem ṭhin hle. Bethlehem Vengthlang mipuiin zanin hian Lammualah an veng club ṭawiawm turin an thawk chhuak ang.
Chhinga Vengin duhthusam result an nei lo nachungin an veng mipuiin an phatsan ngai lo a, Chanmari FC an hmachhawn ṭuma an supporter ṭhat zia hmuh khan BVT lakah pawh an tam ngei a rinawm bawk.