National TT Championship-ah Mizo an che fuh nghal

Nimin khan 11Even Sports TTFI National Ranking Table Tennis Championship, 2016 chu R. Dengṭhuama Indoor Stadium, Mualpuiah khelh ṭan niin Mizo player beiseiawm Lalrinpuia, Lalhunhlua leh Lalmalsawma ten hnehna an chang nghal.

Mizoram Table Tennis Association (MTTA) in a vawi khat nana a thlen National Ranking Championship ni hmasa berah hian Mizoram number 1 Lalmalsawma chuan men's singles-a a match hmasa berah Sandipan Dey chu 10-12, 8-11, 11-9, 11-9, 11-6 (3-2) in a hneh nghal.

Maubawk rawlthar Lalrinpuia chuan a match hmasa zawkah Assam player Klyon chu 3-0 a a hneh hnuin West Bengal aṭanga lokal Tiran Jit chu 3-0 bawkin a hneh zui leh. Inkhel dangah Lalhunhlua chuan a match hmasa berah hnehna a chang ve bawk.

77th Junior and Youth National & Inter - State Table Tennis Cham-pionship nomawi kawltu Rinpuia chuan, "Inelna neih ni hmasa berah mahni khawtual chhung ngeia hnehna ka chang nghal thei hi ka lawm a, Mizo mipuite min lo ṭawngṭaipui chhunzawm turin ka sawm bawk," tiin Vanglaini palai a hrilh.

Mizo player dang Ramduhsanga chu a khingpui tur a inlan loh avangin chak zawka puan a ni a, Zorinsanga erawh Jai Jain lakah a chak lo thung. Inelna neih ṭan ni hian women's singles lamah Vanlalfeli chu a khingpui tur Shruti Talnikar a rawn inlan loh avangin chak zawka puan a ni a, inkhel dangah H. Lalrinawmi erawh a vanduai thung.

North East Open-ah Hmachhuana: November 9-13 chhunga, Imphal, Manipur-a North East Open Tennis Championships khelah men's singles-ah Mizoram aṭanga tel Lalhmachhuana chu pahnihna a ni. Ngopa khaw tlangval Lalhmachhuana hian final-ah Nagaland chhuanvawr Vilesar Khate chu 1-6, 2-6 in a hneh lo. Mizoram aṭanga player kal dangte chuan final an thleng zo lo a ni.