Kan intum leh dawn alawm, in lo thlir dawn nia - Mala Tlai dar 3:00-ah AFC Vs Dinthar
I League club Aizawl FC-in September 29 zan--ah hetih hunlaia table mawngphaha awm Din-thar FC an hmachhawn a, goal awm loin an inhnehtawk. Inkhelh banah AFC coach Mala chuan, "Kan intum leh dawn alawm, in lo thlir dawn nia," tiin Zonet TV-in a kawmnaah a sawi.
Vawiin tlai dar 3:00 hian Aizawl FC-in MPL hmasa ber champion Dinthar FC an hmachhawn leh dawn a, inkhelh tawhna boruak leh result-in club pahnih hmalam dinhmun a nghawng theih bawk avangin tlai inkhel a hmuhnawn ang.
AFC ngam loh Dinthar
Dinthar FC hian Ai-zawl FC hi MPL bikah vawi kua an hmachhawn tawh a, vawi li an chak. I League club erawh vawi khat chiah an chak thung.
Hei chauh hi a ni lo, I Day Football 2014 final-ah Dinthar FC hian K. Malsawmkima enkawl Aizawl FC chu an lo hneh tawh bawk.
Tun season ṭantirh kha Dinthar FC chhiat ber ṭuma ngaih ni mah se MPL champion lai lakah coach Lalhlupuia Sailo kaihhruaina leh Dinthar mipui ṭanpuinain point khat an hlawh chhuak tho. Club pahnih sulhnu thlir chuan Aizawl FC hian Dinthar hi an ngam lo tipawhin a sawi theih.
An tlawm la
Aizawl FC coach K. Malsawmkima pawhin Dinthar FC laka point thum a hlawhchhuah zawh loh avangin inkhelh bana Zonet TV-in a kawm ṭumin a insum zo lo a, an inkhelh leh hun tur a thlir nghal. Amaherawhchu thla khat chuang a liam leh meuh chuan Dinthar an insiamṭha tawh a, a hun laiin Aizawl FC hi tlawm la viau mah se tlawm an la nawn lo ang tih a sawi theih loh.
I League-a Aizawl FC kaipui theitu coach Mala chuan, "Dinthar hian hma an sawn tawh ngei a, han huphurh em em tur chu an ni lo. Chanmari West nena an khel kha ka en a, an khelh loh dan deuha khelh pawh ṭul ang," tiin khelh fimkhur a ṭul thu Vanglaini palai a hrilh.
Mal-a chuan, "Trai-ning-naah pawh player-te hnenah Dinthar kan draw zawha ka thu-sawi hi infuih nan kan hmang nawn a, chak ngei ngei kan tum a ni," tiin point thum hlawhchhuah ngei an mamawh thu a sawi.
MPL champion lai hian hrem vangin Bright Middleton Mends an chhawr thei dawn lo a, inhliam vangin Albert Zo-hmingmawia leh Van-lalduatsanga te an la inlan hmel lo bawk. Player ṭha pathum vang hian AFC hmabak a harsa sawt ang.
Theih loh a awm lo - Lalhlua
Dinthar FC-in Aizawl FC laka point an sual chhuah hnuah chak loh an nei tawh lo a, October thla chhung zawng khan hneh loh an tawng lo tihna a ni.
Dinthar boss Lalhlua chuan, "Khawvelah tih theih loh a awm lo a, Aizawl FC pawh kan hneh thei ang," tiin Chanmari West an draw zawhah a sawi.
Lalhlua hian tun thleng pawhin a ngaih dan a la thlak lo a, Dinthar coach chuan, "Kan match hmasa zawkah khan defensive ringawtin kan khel a, tunah chuan point thum hmuh tumin kan risk ngam tawh ang. Kan player-te pawh an dam kim e," tiin Vanglaini palai a hrilh.
Dinthar hian foreigner pahnih Balogun Hammed leh Clarence Carter te an kawl a, Nigerian defender Balogun-a'n match hnu-hnung pahnihah goal a khung ve ve. Aizawl FC-in an foreigner-te an ṭhat pui loh laiin Dinthar erawhin an foreigner player-te an
ṭhat pui a, hei hian vawiin tlai inkhel a ti hmuhnawm sawt ang.