England manager turin Southgate-a hmanhmawh

Gareth Southgate chuan England manager nghet a nih dawn leh dawn loh chu thla khat chhunga hriat ngei a duh thu a sawi. England Under-21 coach hi Sam Allardyce ban a nih hnuah match li chhung an ram team kaihruai tura ruat lailawk a ni a, a match hnuhnung ber chu zanin dar 1:30 a Spain nen friendly match an khelh hunah a hmachhawn ang.

Match thum chhung England a kaihhruai tawha tlawm hmel la hmu lo Southgate chuan, "November thla laihawlah enge ka tih dawn tih hi ka hriat a ṭul tawh a ni. European Under-21 Championship khelh tur kan hmaah a awm mek a, senior team-in March thlaah qualifier khelh tur an nei lehnghal bawk. A eng zawk tan hian nge ka inbuatsaih dawn tih hi hriat vat ka duh a ni," a ti.

FA chairman Greg Clarke, technical director Dan Ashworth, chief executive Martin Glenn leh League Managers' Association chairman Howard Wilkinson te chuan England manager thar tur hi an ruat dawn a, South-gate-a beisei angin November-ah manager thar an ruat hman lo a nih pawhin kumin chhung ngeia thutlukna siam hman tura beisei an ni.

World Cup qualifying-a point kua hlawh chhuah theih aṭanga point sarih hlawh chhuaktu Southgate hian kum 2006-09 chhunga Middlesbrough a kaihruai tih loh kha chu senior level-ah tawnhriat a ngah lo hle. Mahse, Southgate a zam lo. English manager chuan, "Pep Guardiola-a'n Barcelona a enkawl khan B team bak a la enkawl ngai lo. Kan kalkawng a in ang vek thei lo a, kawng zawh awlsam sa hi awmin ka ring lo," tiin a hmaa chona inchhawp chu hmachhawn a zuam hle.

Hetihlai hian hliam damkawr Tottenham striker Harry Kane chu England squad aṭangin chhuah zalen a ni a, England boss Gareth Southgate chuan an training session neih tur chu hliam damkawr Kane tan a
ṭangkai loh vanga chhuah zalen a nih thu a sawi.

England hian Kane thlak tur striker dang an ko hran lo a, Spurs striker tel lo pawhin Daniel Sturridge, Jamie Vardy, Marcus Rashford, Wayne Rooney leh Theo Walcott an neih avangin England an buai phah lo ang.