ISL khel leh tawh dawn

Kum thar lawmna chawlh an hman hnuah Indian Super League pawh zaninah khelh a ni leh dawn ta a, dar 7:30 hian Mumbai City leh Kerala Blasters an inkhel ang. 

Hmingthanmawia (Valpuia) khelhna Mumbai hi table-ah pahnihna an ni mek a, point 16 an nei - an chung chiaha awm ATK Mohun Bagan aiin point khatin an hnufual a, match khatin an khel tlem thung. 

Kibu Vicuna enkawlna hnuaiah Blasters-in beisei an phak rih lo a, table-ah pakuana niin match sarih khelh tawhah point ruk chiah an la nei - an match hnuhnung berah Hyderabad FC chu 2-0 a an hneh avangin an inrintawk vanglai tak a ni thung. South Indian club-ah hian defender Lalruatthara leh midfielder K. Lalṭhathanga (Puitea) chu Mizoram player an ni. 

Pathianni zanah inkhel a awm dawn bawk a, zan dar 5:00-ah Jeje Lalpekhlua leh Lalramchullova te khelhna East Bengal leh Odisha an inkhel ang - Odisha-ah hian midfielder Jerry Mawihmingthanga, Lalhrezuala Sailung, Paul Ramfangzauva , Samuel Lalmuanpuia, Isak Vanlalruatfela leh striker Daniel Lalhlimpuia te an awm mek. 

East Bengal hian ISL-a an season hmasa berah chak an la nei lo a, match sarih khelh tawhah point thum chiah an la nei - an hmachhawn tur Odisha hi an hnuai chiahah table mawngphah luahlumin an awm a, match sarih khelh tawhah point hnih bak an la nei thei lo. 

Kolkata club EB hian an talbuaina lak ata chhanchhuak turin Nigerian striker Bright Enobakhare an lalut a,     Wolverhampton Wanderers striker hlui hi kum 22 mi chauh a la nih avangin hmabak a nei êng hle - quarantine (inkhunghran) hun a hmang zo tawh a, club training a zawm tawh avangin Odisha hmachhawn thei dinhmunah a ding. 

Pathianni zan dar 7:30-ah hmahruaitu ATK Mohun Bagan leh NorthEast United an inkhel dawn bawk a, Highlander-ah hian midfielder Lalengmawia (Apuia), Lalrempuia Fanai, Rochharzela leh forward Lalkhawpuimawia (Mapuia) te an awm mek.

NorthEast United hi table-ah parukna an ni mek a, match riat an khelh tawhah point 11 an nei - playoff khelh beiseina an la nei ve reng.