Barca inkhel leh duh lo!

Spanish champion Barcelona chuan Pathiannia Japanese club Vissel Kobe nena an pre-season friendly match tur chu an cancel a, Catalan club chuan promoter lam dan bawhchhiat avanga inlan thei lo an nih thu an sawi.

Ruahman dan chuan Barca leh Vissel Kobe hi Tokyo khawpuia inkhel tur an ni a, mahse, Catalan club chuan, "Barcelona chuan Pathiannia Japan-a kan inkhel tur chu kan ṭhulh a, hei hi promoter lamin dan bawhchhiat an neih vang a ni," an ti.

Barca hian promoter hming lam tel lo mah se, Japan-a an zin tur thu an puan khan Yasuda Group chu promoter an nih thu an sawi a, he thu buatsaih a nih lai hian eng thil tak nge an bawhchhiat hriat a la ni lo.

Hansi Flick-a enkawl team hi karleh lamah, South Korean club FC Seoul leh Daegu te nen inkhel tur an ni bawk a, South Korea-a an inkhel tur chu tihhlawhtlin hram an tum thu an sawi.

Barca chuan, "Hetihrual hian South Korea-a kan tour tur erawh, promoter lamin kan duhnate an tihhlawhtlin theih chuan tihhlawhtlin kan tum ang. Kan zin tur ṭhulh a ngai leh, Japan-a kan fan-te a nghawng theih dan tur kan ngaihtuahin, a pawi kan ti takzet a ni," an ti.

South Korea lama Barca inkhel tur buaipuitu D-Drive chuan, "Match hriatreng tur khelh a nih nan theihtawp kan chhuah," an ti a, J1 League champions Vissel Kobe chuan fan-te hnenah ngaihdam an lo dil ve bawk.

Vissel Kobe chuan, "He inkhel nghakhlel taka lo thlirtute leh fan-te chungah ngaihdam kan dil a, thil awmzia chiang taka hre turin theihtawp kan chhuah mek a ni," an ti.

Barcelona hian August 16-ah tun season La Liga-a an match hmasa ber an khel ang a, Real Mallorca chu khualmualah an lenchilh ang.