MLS club-in Son lakluh tum

Major League Soccer club Los Angeles FC chuan Tottenham Hotspur captain Son Heung-min lakluh tumin an dawr a, US club hian South Korean forward lakluh ngei tum hian hman an la na hle nia sawi a ni.

Son hian season hman zawh takah khan Spurs chu Europa League nomawi a chawipui a, mahse, London club hian coach thar Thomas Frank an neih avangin Son hi chhuak mai tur anga sawi thawm a ri ring hle.

Los Angeles hian Son hi an la lut thei a nih chuan, MLS-a player lakluh langsar ber pawl a ni nghal dawn tihna a ni a, LA hian an sumdawnna lamah nasa takin an hlawkpui thei dawn bawk - Asia lamah Son hi a tla na lehzual a, Los Angeles khawpuiah hian Korean 320,000 zet an cheng bawk.

Hetihrual hian Son hian Spurs chhuahsan dawn pawh ni se, tun tut tutah chuan inrem theih a ni dawn lo - London club hian tun thla tawp lamah Asia tour neiin, Arsenal (Hong Kong) leh Newcastle United (South Korea) an inkhelhpui dawn a, Son a tel ngei a ngai.

A bik takin Seoul-a an inkhel turah hian Son a inlan loh chuan Spurs sum dawn tur hi 75% velin a tlahniam nghal dawn nia sawi a ni a, South Korean forward hian eng club pawh zawm dawn se tun thla chu Spurs tan a khelh a la ngai hrim hrim.

Kum 33 mi Son hian August 2015 khan Bayer Leverkusen aṭangin Spurs hi a zawm a, match 454 a inlansakah goal 173 khungin, assist vawi 101 a nei thei - London club tan hian a season hmasa ber tih lohah chuan, season tinin goal 10 a la khung tling ziah.