Chelsea-in Dutch duo dawr

FIFA Club World Cup champion Chelsea-in squad tihchhah belh zel an la tum a, Ajax centre back Jorrel Hato leh RB Leipzig forward Xavi Simons te lakluh an tum. Khawthlang media-te ziah danin Blues hian Ajax thuneitute an bia a, Simons erawh mimal contract chungchang an sawipui thung.

Kum 19 mi Hato hi Europe-a defender chhuak thar ṭha ber zinga mi a ni a, season liam ta khan Eredivisie-ah match 31 a inlan. Blues hian tun nipuia lak theih a nih beiseiin Dutch club hi an dawr a, inremna a la awm lo.

Kum 22 mi Simons hian Stamford Bridge pan a hreh lo a, Blues lamin midfield-a player fing leh rem hria neih belh an duh. RB Leipzig pawhin London club-in Simons an dawr tih an hriatpui a, inremna an la nei lo.

Simons hian season hnih chhung PSG aṭanga loan hmanga RB Leipzig tana season hnih leh a chanve a khelh hnuin January thla khan German club hian an la nghet. Dutch midfielder hian chona thar hmachhawn a, chhuah a hreh lo a, Bayern Munich leh Arsenal te pawhin squad tihchhah nan an duh. Chutihrualin Bayern lamin Simons hi duh mah se Liverpool winger Luis Diaz lamah an awn zawk a, Arsenal lam pawhin an ngaichang ve reng.

Chelsea hian nikum nipui bazarah sum an hmang ṭeuh a, tun nipui bazarah pawh sum an hmang hnem tawh hle. Borussia Dortmund aṭangin Jamie Gittens (£48mtd), Brighton aṭangin Joao Pedro (£60mtd), Ipswich Town aṭangin Liam Delap (£30mtd), Lyon aṭangin Mamadou Sarr (£12mtd), Sporting aṭangin Dario Essugo (£18mtd), Palmeiras aṭangin Estevao Willian (£29mtd) leh Independiente del Valle aṭangin Kendry Paez (£17mtd) te an la lut tawh. An sum hman tawh zawng zawng hi £214mtd a tling tawh a, heti chung hian player lak belh an la tum cheu.