West Ham-in Wilson an dawr

Premier League club West Ham chuan club nei loa awm mek Callum Wilson an dawr a, English striker hian Newcastle United a chhuahsan hnuah club nei loin a awm mek.

Kum 33 mi Wilson hian Bournemouth aṭangin kum 2020 khan Magpies a pan a, mahse, pound maktaduai 20 bawr vel senga an lakluh striker hian hliam vangin khelmual pawnah hun a hmang tam hle.

Season hman zawh takah pawh khan match 22 chiah khelin goal khat a khung a, Magpies nen contract thar chungchangah an inrem theih loh zui avangin a chhuak ta.

Mahse, Magpies tan match 130-a goal 49 leh assist 11 neitu striker hi a inhliam loh chuan player hriam leh goal khung thei a ni a, Hammers bakah hian Premier League club engemawzatin an dawr nia sawi a ni a, Major League Soccer lam hming pawh an lam ri.

West Ham hi an bazar nasa viau a, Wilson an dawr hma hian Jean-Clair Todibo, El Hadji Malick Diouf, Kyle Walker-Peters leh Daniel Cummings te chu tun nipuia an lakluh tawhte an ni.

Season hman zawh takah khan Hammers hian EPL-ah goal 46 chiah khungin, goal khung tlem lamah parukna an ni a, Borussia Dortmund aṭanga lakluh Niklas Fullkrug-a'n goal thum chiah khungin beisei a phak lo.