Kar ruk chawl tura thurawn pek Pant

India leh England te chuan Test match vawi nga an khelh tura vawi lina chu Old Trafford, Manchester-ah July 23, Nilaini aṭang khan an khel ṭan a, Men in Blue-in bat hmasain ni khatnaah 264/4 runs siamin bul an ṭan chhe lo.

Mahse, wicketkeeper Rishabh Pant chu 37 runs a siam laiin ke zungṭangah hliam a tuar a, a chawlh rih a ṭul phah. Pant hi a dinhmun enfiah hnuah kar ruk chawl tura thurawn pek a ni.

Ni hnihnaah hian Pant hi team-in a mamawh chuan nachhawkna ei a, kir leh thei tura sawi a ni a. Chutihrualin medical team lam chuan a ke zungṭang hliam a nat belh loh nan inlan tir loh an thlang a, ground a pan ve dawn lo niin an ziak hman. Mahse, Pant hian ground a pan ta tho a, team-in a mamawh huna lut thei turin pavillion lamah a awm. He thuziah lai hian a bat hman lo.

Tun ṭum Test match-ah hian India player inliam an tam ta hle. Nitish Kumar Reddy chu hliam vangin tun series-ah a inlan thei dawn tawh lo a, Test vawi lina khelh mekah hliam vangin Akash Deep leh Arshdeep Singh te an inlan thei lo. Test match hi nga an khel thei a nih chuan July 27, Pathianniah khelh zawh a ni ang.