Tsitsipas leh a coach Ivanisevic inṭhen

Stefanos Tsitsipas chuan season a hman fuh lohna aṭanga tal chhuahna a zawng a, coach Goran Ivanisevic nen hun rei lote chauh an thawkdun hman chungin an inkar an titawp a, boruak thar hip tumin hma a la.

Greek tlangval Tsitsipas leh Ivanisevic te hi kumin May thla khan an thawkdun ṭan chauh a, mahse an inkawp hnuah Grand Slam vawi hnih hmachhawn tawhin match pahnihah chiah hnehna a chang, result a nei ṭha lo hle.

Grass court season bikah phei chuan vawi khat chiah hnehna a chang. Wimbledon a match hmasa berah Valentin Royer nen an intawng a, set hmasa pahnih a hloh hnuah hliam vangin a khel zui thei tawh lo, a zinkawng a tawp nghal bawk.

Croatian coach Ivanisevic hi Novak Djokovic nen pawha kum ruk chhung lo thawkdun tawh a ni a, player enkawl kawngah tawnhriat a nei ṭha tawk. Hmanni deuh khan a player enkawl hi inkhel turin a taksa a fit ṭha tawk lo niin a lo sawi tawh a ni.

Kum 26 mi Tsitsipas chuan, "Kei leh ka team tana a hnathawh avangin Goran chungah lawmthu ka sawi. Tennis huanga a hlawhtlinna leh sulhnu vang chauh ni loin, mi ṭha tak a nih avangin zah pawh ka zah hle bawk.

"Kan duh leh tum ang veka thil a kal loh chang a awm ṭhin a, a chang chuan kan tana ṭha tur nia kan hriatah hian hreh tak chung pawhin thutlukna kan siam a ngai ṭhin," tiin a sawi a, a coach chu ui tak chungin a thlak tih a sawi bawk a ni.

Tsitsipas hi player ṭha tak a ni a, inelna lian 2021 French Open leh 2023 Australian Open-ah te pawh final a lut hial, mahse nomawi inchuhna inkhelah Novak Djokovic a ngam lo, major title tak chu a la vaw chhuak lo.

A khelh ṭhat lai chuan world number 3 hial pawh a ni phak a, mahse nikum French Open hnuah khan Grand Slam a khelh hoah second round a la pel leh lo, tunah chuan world number 29 a ni mek - hmasawn a mamawh hle.

Tun season atan Grand Slam pakhat an la hmabak - August tawp lam aṭangin US Open an khel dawn, chumi hma chuan Tsitsipas hian insiamṭhat ngei a tum dawn, a kum ngaihtuah chuan hun ṭha a la nei tamah a ngaih theih.