Fritz leh Medvedev an chak

US Open khel turin player ṭha ten inbuatsaihna an ṭan a, an inbuatsaihna zinga langsar tak Mubadala Citi DC Open-ah Taylor Fritz leh Daniil Medvedev te chuan an khingpui ve ve hnehin bul an ṭan fuh hle.

Seeded pakhatna Fritz hian Aleksandar Vukic lakah harsatna a tawk lo, ama service hum vek chungin 6-3, 6-2 in a chak. Wimbledon khelh zawh takah khan semifinal a thleng a, grass court inelna lian hnua a tournament khelh leh hmasak berah result ṭha a nei phawt tihna a ni.

American tlangval Fritz hi round hmasa berah a bye a, inkhelh hah ngai loin a tlang phawt - a match lehpekah chuan Matteo Arnaldi a hmachhawn ang. Arnaldi hian inkhel dangah Lorenzo Sonego chu 7-5, 7-5 in a lo hneh ve thung.

Inkhel dangah Daniil Medvedev pawhin harsatna lian tham a tawk lo. Russian star hian Reilly Opelka chu 3-6, 7-5, 6-1 in a hneh a, hard court hi a inkhelh thiamna hmun a nih avangin beisei a nei sang chhungzawm ang.

Medvedev hian tun hmauin US Open nomawi pawh a lo chawi tawh a, mahse clay leh grass court-ah inkhelh a harsat ṭhin avangin a ranking a sang hleithei lo, season tir leh a tawp lama hard court inelna an khelh ṭhin hi atan dinhmun siamṭhatna hun remchang a ni.