ISL khelh a ni ang - Kalyan Chaubey

All India Football Federation president Kalyan Chaubey chuan season thara ISL khelh hun tur la chiang lo mah se, ISL chu khelh ngei a nih tur thu a sawi.

AIFF hian ISL hi Football Sports Development Limited (FSDL) nena thawkduna an kalpui a ni a, mahse, pawl pahnih thawhdunna hi December 2025 hian a tawp tawh dawn.

Mahse, pawl pahnih hian tun thlengin inremna thar an la nei thei lo a, hei vang hian FSDL chuan ISL club-te hnenah lehkha thawnin, ISL atana inbuatsaihna an kalpui theih rih loh thu an hrilh.

Hetiang a nih avang hian ISL club tam tak chuan training pawh la ṭan loin, transfer bazar-ah pawh an duh angin an che ngam lo. Mahse, AIFF President chuan ISL chu chhunzawm ngei a nih tur thu a sawi.

Kalyan Chaubey chuan, "ISL hi khelh ni lo ta se, footballer chauh ni loin, football nena inkaihhnawih mi tam tak a nghawng dawn a, mi sang tel a nghawng dawn. Chuvang chuan league hi khelh a nih ngei theih nan theihtawp kan chhuah dawn a ni," a ti.

AIFF Constitution thar chu tunah hian Supreme Court-ah ngaihtuah mek a ni a, India rama rorelna sang ber hian AIFF chu an dan thar pawm a nih hma chu indawrna lo kalpui rih lo turin a hriattir.

Chaubey chuan, "Court-in thutlukna a siam hunah AIFF chuan hma a la ang a, Indian football-a inhnamhnawih zawng zawngte indawrna a neihpui ang a, tournament kan neih zawng zawng, ISL pawh tiamin, kalpui a nih dan tur a buaipui ang," a ti a, Indian football ngainatute chu lo chi ai lo turin a ngen.