Palace-in neitu thar nei ta

Premier League club Crystal Palace chuan neitu thar a nei ta a, American football team New York Jets neitu Woody Johnson chuan John Textor-a 43% stake chu pound maktaduai 190 bawr velin a lei.

Palace-a a share hralhtu Textor hian Eagle Football Holdings neiin, he company hnuaiah hian football club hrang hrang a nei a, chung zingah chuan Europa League khel tur Lyon pawh an tel.

Ligue 1-a parukna Lyon hi FA Cup champion Palace nen hian Europa League khel tur an ni a, mahse, UEFA danah neitu thuhmun hnuaia awm club pahnih tan inelna inangah a rualin inlan theih a ni lo - hei vang hian UEFA chuan league lama che ṭha lo zawk Palace chu Europa Conference League khel turin an ti.

Palace hi UEFA thutluknaah lawm loin, Court of Arbitration for Sport (CAS) hnenah an kal a, CAS hian thubuai an ngaihtuah mek - Palace-in neitu thar an nei zui ta bawk si a, CAS hian Palace chungah khawngaihna lantir a, Europa League khel tura an ti a nih pawhin a mak lo ang.

FA Cup champion Palace-a share leitu Johnson chuan, "Crystal Palace Football Club neitu zinga ka tel tur hi ka lawm hle. He club hian sulhnu ropui tak neiin, UK-a US Ambassador-a ka awmchhung khan, London chhim lama English football-a an sulhnu ropuizia hi ka hre tawh a ni," a ti.

Pound tluklehdingawn 6.8 vel hausakna nei nia an sawi Johnson chuan sawi zawmin, "Eagles fan-te hian football an tuichilhin, an club tana an inpekzia ka hria a, anni nena inhmuh hlan pawh ka nghakhlel tawh hle a ni," a ti a, a phur hle.

Palace chairman Steve Parish chuan, "Club neitu zingah Woody kan lo lawm a, kan sulhnu ropui takte chhunzawm tura thawh ho kan châk tawh hle a ni," tiin a sawi ve bawk.