Elliott-a'n a hma hun a ngaihtuah

Liverpool midfielder Harvey Elliott chuan World Cup 2026 khelh a châk thu sawiin, England squad-a awm theih nana inkhelh tam chu a mamawh a nih thu a sawi - Anfield a chhuahsan mai thei.

Elliott hian Liverpool chhuahsan mai a rilruk niin an sawi a, thutlukna fel tak erawh a la siam lo. English midfielder hian season hman zawh takah khan inelna hrang hrangah match 28 khelin goal nga a khung a, assist vawi thum a nei.

Match 28 a khelhah hian vawi 22 chu bench aṭangin a lut a, vawi ruk chiah bul a ṭan - match khat lakchhuah a ni bawk a, match nga chiah minute 90 khelh tluan a nei tihna a ni.

Elliott chuan, "Ka duh angin engkim thleng dawn se chuan, Anfield-ah hian ka career zawng zawng hman zawh ka duh. He club hi ka hmangaih em em a, chutihrual chuan ka hma hun ka ngaihtuah tel ve a ngai.

"Ka tana ṭha ber tur ngaihtuah a ṭul. Tum ropui tak ka nei a, World Cup squad-a tel phak ka tum. Player hlawhtling tak nih ka duh. Ka dinhmun dik tak tichiang tura inbiakna neih a ngai a ni," a ti a, a khelh tam dawn loh chuan chhuah a duh.

Kum 22 mi Elliot hian England senior team tan a la khel ngai lo. Age level-ah erawh inlan nual tawhin, thla hmasaa European Under-21 Championship khelh zawh takah khan England chu champion puiin, player of the tournament atan thlan a ni.

Elliot chuan, "Liverpool-in player thar kan nei nual a, hei hian ka inlan tamna chance a titlem dawn em, ka la hre lo. Mahse, chu chu ngaihtuah a, thutlukna ka siam a ngai - tunah erawh Liverpool player ka la ni a, pre-season kan neih mekah rilru ka pek phawt a ṭul," a ti.

Premier League champion Liverpool hian Elliot hi hralh tumna hranpa an nei lo a, kum 2027 thleng Anfield-ah contract a nei. Mahse, July 2019-a Fulham aṭanga an lak player hi an hralh dawn a nih chuan, pound maktaduai 50 aia tlawma hralh an tum lo niin an sawi.

Blackburn Rovers-ah pawh loan-a lo khel tawh Elliot hian Liverpool tan inelna hrang hrangah match 147 khel tawhin, goal 15 a khungsak a, assist vawi 20 a nei.

Reds tan Premier League, League Cup (2), FA Community Shield, UEFA Super Cup leh FIFA Club World Cup a chawi tawh.