Arsenal defender thar Mosquera

Premier League champion tum Arsenal chuan an tlarhnung thuam chak an tum zel a, defender Cristhian Mosquera chu Valencia aṭangin an la lut a, pound maktaduai 13 man niin kum nga chhung daih inremna an ziak.

Kum 21 mi Mosquera hi hmabak nei êng tak a ni a, tuna an inrem danah chuan a contract pangngai a zawh hunah pawh kum khat dang atana pawh sei leh theih tura tih a ni bawk - Emirates Stadium-ah cham rei a tum hle.

Mosquera hi centre-back ni mah se right-back atan a hman theih bawk a, defender chhuak ta Takehiro Tomiyasu hmun ruak a hnawh khat thei ang - Arsenal a zawm duh vangin tun thlatir khan Mosquera hian Spanish club tana a contract neih lai chu a lo titawp tawh a ni.

Spain Under-21 international Mosquera chuan, "Club lian leh ropui zawm theihna remchang ka nei a, ka tan chuan hetiang hun ṭha hi bawhpelh phal chi a ni lo. Kei leh ka chhungte chuan Arsenal kan thleng chiah chu a ropuizia kan hmuh fiah thar bawk.

"Ka beisei leh rin ai daihin ka football zinkawng hi a kal chak a, hmasawn zel ka tumna kawngah tun ṭum hi ka tan chuan hun remchang ṭha lutuk a ni," tiin a sawi a, a club tharah hian khelhna hmun chang nghet tur erawh chuan a beih nasat a ngai dawn.

Mosquera hi mi bik a ni a, kum 2016 khan Valencia a zawm a, hetih lai hian kum 12 mi chauh la niin, kum 17 leh thla ruk mi a nih chuan senior team tan a khel phak der tawh; Valencia tana inlan thei naupan lamah pariatna niin, centre-back bikah chuan a naupang ber a ni.

Gunners manager Mikel Arteta chuan, "Mosquera hi player hmuhnawm leh theihna nei sang a ni," a ti a, sporting director Andrea Berta chuan tunah chauh ni loin nakin zel atana an ṭhatpui tur a nih thu a sawi ve bawk.

Mosquera hian Arsenal player atana puanzar a nih hmain club training a zawm tawh, a club hmasa Valencia chuan phalna an pek avangin Singapore-ah a zin chhuak nghal a, season thar atan a inbuatsaih a ni.

Nipui bazar chhungin Arsenal hian Mosquera hma hian - Martin Zubimendi, Kepa Arrizabalaga, Christian Norgaard leh Noni Madueke te an la fel tawh a, striker Viktor Gyokeres la turin inremna an nei tawh bawk, an ziak lut fel thuaiin a rinawm.

Arsenal hian AC Milan 1-0 in an hneh tawh a, season thar inbuatsaihna an match pahnihna atan Pathianni hian Singapore National Stadium-ah Newcastle United an hmachhawn leh ang. Singapore aṭang han Hong Kong an zin dawn a, an hmelma Tottenham Hotspur nen an intum leh dawn a ni.