AC Milan-ah Estupinan a kal

Brighton & Hove Albion left back Pervis Estupinan chuan AC Milan a zawm a, a man zat hi a khelh ṭhat dan a zira pek belh turte nen vek chuan pound maktaduai 17 a ni - kum 2030 thleng atan contract a ziak.

Ecuadorian defender hian kum 2022 khan Villarreal aṭangin Brighton hi a zawm a, hmun pawimawh a chang nghal - match 104 a inlansak hman a, goal nga khungin, assist vawi 14 a nei.

Kum 2023 khan Brighton chu an club chanchina a vawi khat nan European football a khelhpui a, mahse, Europa League last 16 lut mah se, AS Roma ngam loin an tla.

Brighton head coach Fabian Hurzeler chuan, "Pervis hi thawhpui a nuam ka ti a, club tan hna tam tak a thawk. Mahse, chona thar hmachhawn a duh a, chu hun ṭha chu AC Milan-in an siamsak ta a ni," tiin a player a thlah.

Ecuador tana vawi 48 inlan tawh defender hian an ram club LDU Quito aṭangin professional zinkawng a zawh ṭan a, Granada, Almeria, Real Mallorca leh Osasuna-ah te loan-in a khel tawh bawk.

Kum 2016 khan Watford lo zawm tawh mah se, English club tan hian a inlan miah lo a, Brighton tan season thum ngawt a khel hman thung.

Villarreal tana Europa League nomawi lo chawi tawh defender hian season hman zawh takah khan Brighton tan inelna hrang hrangah match 36 khelin goal khat a khung a, assist vawi khat a nei.