Horner chhuakin ka hma hun a nghawng lo - Verstappen

Red Bull-in team principal an ban tawh a, an team hotupa chhuak hian an driver Max Verstappen hma hun chungchangah erawh nghawng a nei dawn lo thung.

British Grand Prix an tlan zawh hnuah Horner hi an ban, a hmun ruakah Laurent Mekies a awm fel tawh bawk. Team insiksawi chungchang zawhna chhangin Verstappen chuan, "Tuna thil thleng vel hian ka hma huna thutlukna ka siam turah nghawng a neih ka ring lo.

"A rilrua awm leh pawimawh zawk chu engtin nge car chak ṭha tak kan neih ang a, engtin nge kan team hian hma kan sawn theih ang tih hi a ni zawk," a ti a, season kal laiah beisei an phak loh avangin insiamṭhat an mamawh hle.

World champion vawi li ni tawh Verstappen hian Red Bull tan kum 2028 thleng daih contract a nei mek. Dutch tlangval chuan, "Inremna kan neih lai hi a tlem ber zawnga chhut pawhin kum khat leh a chanve daih chu a la ni.

"Chuvangin, season kan hman mekah hian engtin nge tun hma lama kan boruak ṭha leh kaltluang ang kha kan neih leh theih ang tih chu a pawimawh lai a ni, team ṭha dangte elphak kan nih a ngai," tiin a sawi.

Khawvela car intlansiakna sang ber hi season chanve an hmang tawh a, nipui chawlh an neih hnuah Pathianni zan dar 6:30 hian inelna an tlan ṭan leh dawn. Spa-Francorchamps-ah Belgian Grand Prix an tlan leh ang.

Red Bull leh Verstappen hi an insiamṭha vat a nih loh chuan nomawi hloh thei dinhmunah an ding mek - Verstappen chungah McLaren driver pahnih Oscar Piastri leh Lando Norris te an awm mek a, season chawhnu lam inelna a hmuhnawm dawn.