Osaka hnehtu Raducanu

Tennis inelna Washington Open khelh laiah Emma Raducanu chuan Naomi Osaka chu straight set hmanga hnehin quarterfinal a lut a, inkhel dangah Venus Williams erawh a chak lo thung.

British nula Raducanu hian Grand Slam vawi li champion tawh Osaka lakah harsatna lian tham a tawk lo, inkhel thunun tak chungin 6-4, 6-2 in a chak, a match hmasa zawkah seeded pasarihna Marta Kostyuk a lo hneh tawh bawk.

US Open 2021 champion Raducanu hian wildcard hmanga inlan Maria Sakkari a hmachhawn leh dawn, ani hian inkhel dangah seeded pahnihna Emma Navarro chu a lo hneh ve tawh bawk a, an intawng tur hi a hmuhnawm ang.

British number 1 ni thar tur Raducanu chuan, "Naomi hian nomawi lian panga a la tawh a, world number 1 pawh a ni tawh. Player ṭha leh ropui a ni a, ani ka hneh thei hi ka tan chuan a chhinchhiah tlak hle," tiin a sawi.

Venus Williams erawhin seeded pangana Magdalena Frech chu 6-2, 6-2 in a ngam lo thung. Grand Slam vawi sarih champion tawh Venus hi kum 45 mi a ni tawh a, nikum March hnua inelna a hmachhawn leh hmasak berah mipui lawm hlawh viau mah se a duh ang result a nei chhunzawm thei ta lo a ni.