Pathianni zanah Euro hmeichhe final

UEFA Women's Euro 2025 final chu July 27, Pathianni zan hian champion lai England leh record nei ṭha ber Germany hnehtu Spain ten St. Jakob-Park, Basel-ah an khel dawn.

England hian final lut turin Italy an hneh hram a,chutihrualin final thlenpui coach Sarina Wiegman hian inelna lianah record a nei ṭha. Football Association chief executive Mark Bullingham phei chuan Wiegman hi hralh an phal loh thu a sawi hial.

Kum 55 mi Wiegman hian ram inelna lianah vawi nga team enkawl tawhin final an thlenpui vek. Euro 2017 khan Netherlands a champion pui a, World Cup 2019-ah final a thlenpui leh bawk. Tuna a enkawl lai England hi Euro 2022-ah champion puiin World Cup 2023-ah final a thlenpui a, tun ṭum Euro-ah final a thlenpui a, ram inelnaah record a nei ṭha hle.

Germany duo Gero Bisanz (1989, 1991, 1995) leh Tina Theune (1997, 2001, 2005) ten vawi thum ve ve an ram an champion pui tawh a, Wiegman hian England hi a champion pui theih chuan Euro nomawi vawi thum a chawi ve chiah ang.

Chutirhualin England khingpui tur Spain hi Aitana Bonmati awmna a ni a, hmeichhe Ballon d'Or hnuhnung pahnih champion puitu Bonmati hian Germany lakah pawh chakna goal a khung. Final-ah pawh Bonmati enbik tur a ni ang.