Liverpool an tlawm; Diaz a khel lo

Premier League champion Liverpool chuan Inrinni zan khan pre-season friendly match khelin, AC Milan an hmachhawn a, Hong Kong-a inkhelah Reds hi 4-2 in an tlawm.

AC Milan tan Noah Okafor chuan goal hnih khungin, Rafael Leao leh Ruben Loftus-Cheek ten goal khat ve ve an khung bawk - Liverpool tana Dominik Szoboszlai leh Cody Gakpo te goal khungin awmzia a nei phak lo.

Inkhelh zawha sawi zui hlawh ber erawh Luis Diaz inlan lo chu a ni a, Liverpool manager Arne Slot chuan a player chu a hma hun a la chian theih loh avanga inlan tir lo a nih thu a sawi.

Engvang maw?

Diaz hi Barcelona leh Bayern Munich ten lakluh tumin an dawr a, mahse, Reds hian zawrh lai a nih loh thu an lo hrilh. Heti chung hian Bayern hian dawr nawn an tum nia sawi a ni a, Diaz hma hun a chiang lo.

Slot chuan, "Luis hma hun chungchangah sawi neuh neuh a tam a, thui tak sawi pawh ka tum lo. Team tan pawh ṭha takin training a nei a, mahse, tun dinhmunah chuan a inkhelh rih loh hi a ṭha zawkin kan hria a ni," a ti.

Hetihlai hian Diaz ang thoa chhuak tura sawi Darwin Nunez pawh a inlan lo a, Uruguayan striker erawh hliam tenau a neih avanga inlan lo a nih thu Slot chuan a sawi.

Wirtz a inlan

Liverpool tan pound maktaduai 116 thlenga a man sang chho thei tur, tun nipuia Anfield pantu Florian Wirtz a inlan a, German attacking midfielder hi Slot-a'n false nine angin a chhawr chhin a, a hmuhnawm.

Wirtz hi Mohamed Salah leh kum 16 mi Rio Ngumoha ten an thlawp a, season ṭan tak takah chuan, striker hnung chiahah awmin attacking midfielder emaw mual vei lam sirah emaw chhawr a nih a rinawm.

Hong Kong-a inkhelah erawh Wirtz hian false nine ang pawhin chhawr tlak a nihzia a pholang a, player fing bik a nihna hmuh turin a awm fo a, a che velin mit a titlai - Reds fan-ten hmuh nuam an ti khawp ang.

Tlarhnung thlirna

Liverpool tan tlarhnungah, player thar - right back Jeremie Frimpong leh left back Milos Kerkez te wpawh an inlan a, chutihrual chuan centre back hi Reds buaina tur niin a lang.

Reds centre back Joe Gomez chu hliam vangin a haw a, Bayer Leverkusen lamah Jarell Quansah an chhuahtir bawk. AC Milan lakah Virgil van Dijk chu midfielder Ryan Gravenberch nen an inkawp a, Ibrahima Konaté-a'n second half-ah VVD a thlak.

Preston North End nena friendly match an khelh ṭum khan left back Andrew Robertson chu centre back-ah a khel tawh bawk a, Gomez-a hliam dinhmun a zirin tlarhnung hi inthuam chak leh an la mamawh dawn niin a lang.

Hmabak chu

Liverpool hian Crystal Palace-a thla 12 chiah contract nei tawh, defender Marc Guehi an rim mek a, an tun dinhmun thlir chuan England international hi na zawka an rim a rinawm.

Mahse, coach Slot chuan centre back-ah buaina an neih loh thu a sawi thung. Dutch coach chuan, "Tlarhnungah buaina kan neiin ka hre lo - Ryan hi number six angin duh zawk hle mah ila, tlarhnung laia a khelh theihzia min hmuhtir.

"Wataru Endo pawh centre back angin chhawr theih a ni a, duhthlan tur kan ngah tawh. Chutihrual chuan Quansah kan hralh a, amah thlakna kan la rih lo tih hi chu thudik a ni," a ti.

Nghilh loh Jota

Liverpool hian Hong Kong-a an inkhelah hian, an kawr hmaah 'Diogo J 20' tih an ziak a, season thara an kawr hak turah pawh, an ṭhianpa hriatreng nan "Forever 20" tih chu a inziak ang.

July 3-a car accident vanga thi, Liverpool forward Jota hriatreng nan, Reds hian Jota lim pawh siam an tum a, hei hi Anfield pawna, fan-ten amah hriatreng nana an dah thil ṭhenkhat hmanga siam tur a ni dawn a ni.

August 15-a Bournemouth nen Premier League match an khelh hunah pawh Jota hriatrengna hun hman a ni dawn a, fan-ten "Diogo J 20" tih chuanna jersey an lei apiangin, LFC Foundation-ah a hralhna sum chu a kal ang a, Jota hmingin grassroots football programme ruahman a ni dawn bawk.