Forest-ah Gibbs-White a cham dawn

Nottingham Forest midfielder Morgan Gibbs-White chu Tottenham Hotspur a zawm dawn emaw tih hnuah, City Ground lamah a cham leh zawk dawn a, Forest tan kum thum dang khelh chhunzawm turin contract thar a ziak.

Kum 25 mi hian a contract-ah pound maktaduai 60-a chhuah theihna dan a nei a, hei hi Spurs chuan pek inhuamin, Gibbs-White pawh hi London club-a medical nei turin a inbuatsaih vek tawh.

Mahse, Spurs hian a ruka an player hi an lo dawr avangin Forest an lawm lo a, dan anga hmalak an tum hman hial - Premier League danah, club chuan contract nei lai player-te an khelhna club hriat loha an lo dawr ngawt a thiang lo. Tunah erawh an player duh lai an chân dawn lo a, contract thar a ziak ta zawk.

Gibbs White hian Forest-ah hian kum hnih khel turin contract a la nei a, mahse, a contract thar chuan hei hi thai chhiain, kum 2028 thleng Forest tan a khel dawn.

August 2022-a Wolverhampton Wanderers aṭanga £42.5mtd-a Forest pantu hian a club tan hian match 118 khel tawhin, goal 18 a khung a, assist vawi 28 a nei.

Season hman zawh takah khan Forest hi pasarihna nihpuiin, Europa Conference League khel turin a kaipui a, Gibbs-White chuan, "Forest ka zawm tirh khan ka in ang maiah ka ngai nghal a, fans, ka khelhpui leh he club-a mi zawng zawngten min thlawpna hi a awihawm loh zawk a ni," a ti.

England tana vawi li inlan tawh Gibbs-White chuan contract thar a ziah chhan pholangin, "He club hmachhawpte hi ka ring tawk a, club tana thil tum ropui tak neitu Marinakis-a thlawpna hnuaiah thil thar thlentu zinga tel ka duh a, kan hmaa inchhawp hian min tiphur hle a ni," a ti a, Spurs tan ngaihthlak a nuam lo ang.

Forest neitu Evangelos Marinakis chuan, "Club tam takin Morgan hi an duh a, mahse, ani hoa team ṭha tak din kan duh. Kan fan-te ka tiam duh chu, inelna kan hmachhawn dawn a ni mai lo a, season tina hmasawn turin kan bei dawn - chumi atan chuan vawiin hi ke kan pen ṭanna pakhat a ni," a ti a, hma an sawn zel tur thu a sawi.