Wissa-a'n Brentford a vau

Newcastle United hel lai, Brentford forward Yoane Wissa chuan Brentford director of football Phil Giles nen an inbiaknaah ṭawngkam hriam tak a hmang a, Magpies-a a luhna tur an dal a nih chuan Brentford tan inlan a tum tawh loh thu a hrilh!

Bees forward Wissa hi Magpies hian pound maktaduai 25-in an lo dawr tawh a, mahse, an dawrna hi hnawlsak an ni. Brentford hian an hralh dawn a nih pawhin £50mtd aia tlawma hralh an tum lo nia sawi a ni.

Hetiang boruak karah hian, Wissa hi a hma hun chingfel turin, Portugal-a club pre-season training camp aṭangin England-ah a kir a, club thuneitu sang zinga mi Giles nen inbiain, St James' Park-a kal a duh thu hi a hrilh chiang.

He thu buatsaih a nih lai hian Brentford hian an player hi chhuah phalna an la pe lo a, DR Congo international hian, "A hlutna anga dawrtu an awm chuan a chhuak thei ang," tia club nena indawrna an lo neih tawh chu Brentford hian an zah loah a ngai a ni.

Giles pawh hian Wissa chungchangah Newcastle sporting director lailawk Andy Howe chu inbiakna a neihpui nia sawi a ni a, inremna erawh a la awm lo thung.

Wissa hian Brentford-ah hian kum khat contract a la nei a, kum khat dang pawhsei theihna dan a la tel bawk. French club Chateauroux aṭanga a zinkawng zawh ṭantu Wissa hian August 2021 khan Lorient aṭangin Brentford hi a zawm a, 2023-24 season thleng kha chuan striker a la ni lo.

Mahse, attacking midfielder ṭhin Wissa hi Ivan Toney-a'n Brentford a chhuahsan hnuah striker anga chhawr a ni a, season hman zawh takah khan match 39 khela goal 20 khungin, assist vawi nga a nei.