Lalrina Renthlei a champion

Mizoram Snooker & Billiards Association (MSBA) buatsaih - Mizoram State 8 Ball Pool Championship 2025 - 2026 chu Inrinni zan khan khelh zawh a ni a, sulhnu nei ṭha Lalrina Renthlei bawk a champion.

Mizoram State 8 Ball Pool Championship final-ah hian Lalrina Renthlei leh PB Liansangzuala te an inhmachhawn a, race to 8 (frame riat chak hmasa sa chak) in an khel a, Lalrina hi 8-0 in a chungnung.

Semifinal-ah Lalrina hian Peter Lalrintluanga chu 7-3 in an hneh a, quarterfinal-ah Lalchhandama a hneh bawk a, ṭum dang ang bawkin Tuikhuahtlang star hian amah khing zotu a hmu lo.

Inelna hi Mizoram Snooker & Billiards Association (MSBA) Hall, Hawla Indoor Stadium-ah khelh niin Mizoram chhung hmun hrang hrang aṭangin infiammi mi 100 chuang an tel a, knockout-a khelh a ni.

Season kal laiah MSBA-in championship vawi hnih a buatsaihna a ni a. Tuna mi hma hian Mizoram 10 Ball Pool Championship a lo buatsaih tawh a, season kal lai hi nakkum March thleng a ni ang.

MSBA hian Mizo Zirlai Pawl (MZP) nen ṭangdunin August 6-8 chhung hian - Inter College 9 Ball Pool Championship 2025 an buatsaih dawn a, tel turte chu July 28 - August 5 chhung hian a thlawna khelhna hun an hawnsak dawn a ni.