Fernandes-a'n Man United a chakpui

Manchester United chuan tun season pre season friendly-ah a vawi khat nan chak hmel an hmu a, nimin zing khan New Jersey-ah West Ham United 2-1 in an hneh. Captain Bruno Fernandes-a'n goal hnih a khung a, player thar Matheus Cunha a inlan bawk.

Ruben Amorim hote nipui bazarah an che ṭha tawk lo a, striker lakluh duh mah se an duh ang player an lak theih miau loh avangin Rasmus Hojlund-a chungah rinna an nghah a la ngai. Danish stiker hian inkhelh ṭantir lamah theihna a nei tih chu lantir mah se goal khung tak a la harsat a, rinrawl bera hman tur niin a la lang lo.

Chutihrualin Man United inkhel erawh a nung ṭha thawkhat a, minute ngana lekah Ayden Heaven-a penalty hlawhchhuah chu Bruno Fernandes-a'n cool takin a khung. Portuguese midfielder a hmuhnawm a, minute 52-naa a goal khung pawh a mawi hle.

Andre Onana inhliam vanga bul ṭan Altay Bayındir-a'n bul a ṭan a, Turkish keeper tan minute 63-naa Jarrod Bowen-a goal khung dan ngaihna a awm lo. Chutihrualin Bayindir pawh han thlamuanpui tham niin a lang lo.

Player thar Matheus Cunha-a'n ball a keng thei a, inkhelh banah pawh tlarhmaa a awmpui Hojlund nen Amorim-a'n a fak. Bentford aṭanga an lakluh Bryan Mbeumo erawh squad-ah an la dah lo a, July 31, Ningani zinga Bournemouth nena an inkhelh hunah a la inlan hman a beiseiawm loh. Chutihrualin Everton nen August 3, Pathianni zana an inkhelh hunah a inlan theih beisei a ni.