I Day Football khelh ṭan a ni dawn ta

Tualchhung football inelna ngaihhlut I Day Football 2025 chu vawiin aṭangin RG Stadium-ah khelh ṭan a ni dawn a, inelna hi Mizoram Premier League club-te dinhmun hriatna ṭha tak a ni thei ang. Inkhel en man hi Rs 50 a ni a, Zonet Zawlbukah a en theih bawk ang.

Vawiin chhun dar 12:00 hian Mizoram Police leh SYS FC te an inkhel ang a, tlai dar 3:00-ah Kanan FC leh Ramhlun North FC te an inkhel ang. Group A aṭang hian team pathumin quarterfinal an lut a, tla pakhat chauh an awm dawn.

Police thar

Mizoram Police-in recruitment an nei a, champion lai Lalbiaksanga Colney hote hi ṭha sawt tura ngaih an ni. Mahse, Police hian recruitment an hmang ṭha tawk lo a, season liam ta aiin an ṭha kher ang em tih chu zawhna lian tak a ni.

CYMA Football-ah F. Lalrinpuia'n Republic Veng a champion pui a, Valpuia hian Police team hi a ho thei dawn a; Malsawmfela, Lalbiakhlua leh R. Malsawmtluanga te ho tho an la ni dawn.

Police khingpui tur SYS FC hian season liam taa an player ṭha a an chan nual a, coach Lalmuankima hote dinhmun tur hi hriatthiam an la har. Mawlmang taka player neih dan aṭanga thlir chuan SYS hi group A-a team nem ber anga ngaih theih an ni.

MPL Vs 1st Div

Tlai dar 3:00-a Kanan FC leh Ramhlun North FC inkhel tur hi inkhel en châkawm zawk chu a ni a, Kanan hi MPL club ni mah se an khingpui Ramhlun North nen hian an danglam tam lo hle.

Kanan coach Chawngthansanga hian MPL-ah sulhnu a nei ṭha a, mahse Mizoram inelna sang bera team a enkawl lohna hi a rei ta deuh. Chutihrualin Kanan club thuneituten Chawnga hi an thlawp ṭha a, player ṭha an pe. Mizoram Police-a a ngheta lut ta lo keeper R. Malsawmkima (Mana) leh forward F. Lallawmkima te an lalut.

Nipui bazarah Kanan che na viau mah se an khingpui Ramhlun North hi an che na ve tho. Ramhlun North hian season tharah MPL khelh ngei an tum a, MPL lama tawnhriat nei ṭha Lalrindika Hmar an lalut. MPL-a tawnhriat nei ṭha Vanlalthanga, Peter Lalrinhlua, F. Lalnuntluanga leh Valpuia te an nei a, Kanan hi an hlau bik lo ang.