Saudi lamah Felix a pem dawn

Chelsea forward Joao Felix chuan Saudi Arabia lam panin a puanthuah a tel dawn a, Al-Nassr chuan Portugal international hi an la lut dawn - a man hi pound maktaduai 43.7 thlenga sang chho thei tur a ni ang.

Felix hi a chawr chhuahna Benfica lama kir tur anga sawi thawm a awm hman a, mahse, Cristiano Ronalo-a'n Portugal tana a khelhpui forward hi Al Nassr-ah zawm turin a sawm nia sawi a ni a, Saudi lam a pan dawn ta.

Chelsea hian season hmasa khan Atletico Madrid aṭangin Felix hi £45mtd-in an lei a, mahse, an player leina hi an hmu let dawn - tunah £43.7mtd in an hralh a, AC Milan-a loan-a an kaltir manah khan £5mtd an dawng bawk.

Kum 25 mi Felix hi Benfica tana a khelh laiin a hming a chher viau a, July 2019 khan Atletico Madrid chuan £113mtd-a leiin, football khawvel a nghawrnghing chiang hle.

Mahse, Portugal international hian beisei a phak lo zui. Atletico tan match 131 khela goal 34 khungin, assist vawi 18 a nei hram a, Chelsea (loan) leh Barcelona (loan) ah te a khel zui.

Season hmasa ṭan dawn khan Chelsea hi a nghetin a zawm zui a, mahse, beisei a phak chuang lo. Blues-a a hun hmasaah hian loan-in a khel a, a ngheta a zawm hnuah pawh thla ruk chauh a khelh avangin season khat awrh khel ang a ni.

London club tan hian match 40-ah goal 11 khungin, assist vawi hnih a nei. Barca-ah khan match 44 khelin goal 10 a khung a, assist vawi ruk a nei tling.

AC Milan-ah beisei a phak chuang lo a, match 21-ah goal thum a khung hram a, assist vawi khat a nei - tunah chuan Saudi a pan ta a, an ram captain Ronaldo-te nen khel hoin, hming chher thar leh a beisei ang.