Silly Point: Draw-Chester

Old Trafford pitch mam ṭha lutuk leh second innings-a centurian Shubman Gill, Ravindra Jadeja leh Washington Sunder te puihnain India chuan mualneitu England an draw thei hram. The Oval, London-ah Test ṭum ngana leh hnuhnung ber chu khelh a ni dawn a, July 31, Ninganiah khelh ṭan a ni ang.

England hian hnehna chang se, series la thei mai tawh tur an ni a, India tan thawhchhuah ngaihna a awm tawh dawn lo. Mahse, second innings-ah run khat pawh an siam hmaa wicket hnih an hloh chungin India an tho chhuak a, KL Rahul leh Shubman Gill te chet dan chu March 11, 2001-a India-in Kolkata-a Australia an hneh ṭuma VVS Laxman leh Rahul Dravid chet dan nente pawh an khaikhin hial. England-in 2-1 in hma an hruai a, Hamara Desh-in Ben Stokes leh a hote hi an la nihrual thei thung.

Bum hmang Manchester

England-a cricket khelmual zingah ro ro pawh ball swing tamna Old Trafford tia kan lo sawi chamchi chu, beisei ang a ni hauh lo. English Cricket pachal David Loyd-a'n a ni khatna pitch report a pek ṭum a, hetiang ang Old Trafford pitch mam (flat) leh batting tana nawmna tur hi ka la hmu ngai lo, a tih aṭang khan ka ngaih a ṭha lo tan a.

Loyd-a sawi chu a dik tih sawhnghet turin a ni khatna aṭanga batting scorecard en khan a chiang mai awm e. India khan bat hmasain first innings-ah 358 runs an siam thei tlat a, England an rawn bat leh chiah phei kha chuan a run siam a awl hmel lehzual.

1st innings a pawimawh

Ni nga chhung inkhel over 30 den dena session 15 a ṭhen darhah hian, 1st innings-a run vaw chhuak hnem zawk nih hi a pawimawh em em a. Hetiang ang batting nawmna pitch-ah lek phei chuan a pawimawh lehzual ṭhin a ni.

Rawlthar Sai Sudharsan-a'n a talent a phochhuak a, technical & tactical lama hmasawna tur erawh a la ngah tih a hriat theih. Rishab Pant inhliam a pawi takzet a. England captain hlui Joe Root-a'n a class a phochhuak a, tikhan Test cricket record bua, Sachin Tendulkar a run siam zat chu 2500 chauhin a phak tawh lo.

Root hian Tendulkar-a record hi a rawn khum dawn nite pawhin a lang. Captain Ben Stokes lah batting leh bowling a ni emaw, England innghahna kulhpui ber a ni tih a ni telin kan hmu zel a. Wicket nga a lak bakah century pawimawh a hlap chhuak bawk a. Run 300 chuanga hma an hruai tawh kha chuan India tan chak theihna dan a awm tawh lo tih a chiang a, an tihtheih sang ber chu draw game khelh kha a ni tawh mai.

Bowlers luaithli nulna

Series chawhnu lam a ni tawh a, bowlers an chau tih a lang chiang reng tawh a. A bik takin Jasprit Bumrah leh Md Siraj te bowling khan tur a pai lo ti ila kan sawi sual lo ang. Kei ngei pawh hi retirement aṭanga rawn let leh a, bat hum ṭhat leh te pawh min tichâk hman rum rum hman a ni.

India tana vawi khat khelhna Anshul Kamboj-a'n darkar khata 130 km vela chaka vawmin English batman-te a tibuai dawn lo tih a chiang. Tun hnaia India bowling department khawngaihthlak ber ṭum a ni hial awm e. Wicket 20 lak theih miau loh chuan, result ṭha ber chu draw a nih mai loah.

Drama- Test Cricket Ropuina

Run 311 a hnufual India-ten a ṭha berah draw turin a ni 4-na session hnihna leh ni ngana ni leng bat an mamawh a. Manganthlak khawpin bul an ṭan chhia, India team scoreboard a run 1 pawh a lan hmain, Yashavi Jaiswal leh Sai Sudharsan te pavilion lamah an let leh tawh a nih kha.

Heta ṭang kha chuan 99% chuan engtik nge India team te an out kim hun niang aw? tih kha kan rilru a awm a ni deuh vek tawh ang. England chak chianga ngaih an ni a, series la thei mai dihmunah an ding.

Kan la tel ve aniaa...

Wicket hloh loa batting ngawt ngawr tum hi cricket a thil har ber a ni a. Tun ang lai T20-in min chiah hneh tawh hnu a, batman tin mai run vuakchhuah siak generation-ah kan awm tawh laia session 4 India batting line up-te out lo a, ball lo khel zat zat phei chu, besei a sang lo hle.

Mahse, Manchester pitch-in zah a ngai a, ṭhat a chhuah a, Shubman Gill leh KL Rahul ten, "Tun hi mi puitling kan ni tih phochhuah hun," ti ni awm takin zawimuangin an kal dem dem a. India tan chuan result ṭha ber leh awmthei chhun draw an hlawh chhuak ta a nih kha maw.

India tan series draw-na chance a inhawng ta thung a ni. Chawlh a rei dawn lo a, player ṭhahnem tak inhliam leh inlan thei tawh lo tur an awm a. Rishab Pant-a'n Nitish Reddy a hnung zuiin a puanthuah a tel a ngai ve ta a. Tun Ningani The Oval inkhel chu skills leh technique bakah, rilru lama paukhauh zawk zawk dinchanna series finale a nih tak mai hmel e.